Noticias

A segunda edición da Festa do Banquete celebrarase os días 3, 4 e 5 de maio no barrio de Conxo e, para preparar a data, a veciñanza tivo a oportunidade este sábado de coñecer que aconteceu aquel 2 de marzo de 1856.

A Xunta de Goberno aprobou hoxe o proxecto da zona cuberta de usos múltiples de Santa Marta, unha actuación derivada do proceso dos orzamentos participativos Compostela Decide 2018. A actuación suporá un investimento de case 137.000 euros.

Os departamentos de Comercio e Lingua veñen de convocar 20 cheques de consultoría en comunicación comercial e adecuación de locais dentro do programa Coidar para mellorar, mellorar para coidar, posto en marcha en setembro de 2018 como resultado da unificación de dúas convocatorias de axudas.

A Alameda acolle ata o vindeiro 8 de maio a exposición Terra de soños, de Cristina García Rodero. A mostra, organizada por "la Caixa" en colaboración co Concello de Santiago e a Fundación Vicente Ferrer, reúne 40 fotografías que reflicten a vida cotiá dos habitantes de Anantapur, no estado de Andhra Pradesh, unha das zonas máis pobres da India, onde viven as comunidades máis marxinais e vulnerables do país.

A Concellaría de Mocidade organiza unha nova edición do Campamento de verán de vela e actividades náuticas. A actividade desenvolverase entre o 4 e o 23 de xullo, e está dirixida a mozos e mozas de entre 14 e 17 anos.

A parroquia da Gracia vén de incorporarse ao programa de compostaxe doméstica impulsado pola Concellaría de Medio Ambiente e Convivencia, e que acaba de iniciar a súa segunda fase. O concelleiro Xan Duro participou onte na entrega dos composteiros ás familias participantes.

O Concello de Santiago e a Deputación da Coruña organizan o FICRural (Feira Internacional de Economía e Cultura Rural e Alternativa), unha actividade nacida co obxectivo de ser un foro de intercambio e divulgación de experiencias en entornos rurais. Os detalles da iniciativa déronos esta mañá a concelleira de Igualdade e o concelleiro de Medio Rural, Marta Lois e Rafael Peña; a vicepresidenta da Deputación da Coruña, Goretti Sanmartín; e Aser Álvarez, organizador do FICRural.

O Boletín Oficial da Provincia publicou onte as bases da convocatoria pola que se outorgan axudas individuais para uso do taxi para persoas con dificultades de mobilidade. Da apertura do prazo para solicitalas, novidades e características da mesma deu conta esta mañá a concelleira de Políticas Sociais, Diversidade, Saúde e Centros Cívicos, Concha Fernández, acompañada da traballadora social Ana Ares.

Todo listo para o comezo do Programa Municipal de Conciliación de Semana Santa, dirixido a nenos e nenas de entre 3 e 12 anos que estean empadroados no Concello de Santiago. Ata o pasado 5 de abril inscribíronse un total de 79 escolares, 41 para o CEIP Monte dos Postes e 38 para o CEIP Raíña Fabiola.

O club Arteal Tenis de Mesa segue colleitando éxitos, xa que vén de proclamarse gañador da Copa do Rei 2019, motivo polo que os seus integrantes foron recibidos en Raxoi polo alcalde, Martiño Noriega, e por outras integrantes da Corporación.