Noticias

Santiago vivirá as festas do Apóstolo do 18 ao 31 de xullo, cun programa no que este ano destaca a presenza de artistas femininas, a vocación de mostrar a cultura migrante e a aposta polos grandes cabezas de cartel. A concelleira de Acción Cultural, Branca Novoneyra, debullou hoxe a programación, na que tampouco faltarán os concertos das bandas do censo Compostela É Música nin as citas máis tradicionais do Apóstolo.

A exposición A pegada do coñecemento reúne na Casa do Cabido, dende mediados do pasado mes de abril, os principais fondos da biblioteca histórica do Instituto Arcebispo Xelmírez I, que foi restaurada durante os últimos dous anos co apoio do Consorcio de Santiago. A mostra, que pode visitarse de 10:00 a 14:00 e de 17:00 a 21:00 horas, pecha este xoves, 5 de xullo.

A concelleira de Economía e Facenda, María Rozas, está a participar na cidade francesa de Rennes da xuntanza de coordinación do proxecto europeo Atlantic Social Lab. A capital galega forma parte deste programa xunto a sete entidades de Irlanda, Reino Unido, Francia e Portugal.

O Goberno local participará o próximo venres nun novo encontro Ao vivo, desta vez na Casa das Asociacións de Benestar Social de Salgueiriños, e dirixido á veciñanza deste barrio, de Cancelas e de Meixonfrío. Á xuntanza asistirán o alcalde, Martiño Noriega, e todos os concelleiros e concelleiras do Goberno.

O alcalde, Martiño Noriega, asistiu esta mañá á inauguración do Pórtico da Gloria, despois do proxecto de conservación e restauración ao que foi sometido dende o ano 2009. O acto estivo presidido pola raíña Dona Sofía.