Noticias

Un ano máis, o Concello e o Foro de Inmigración poñen en marcha a súa oferta de actividades de sensibilización para escolares en torno ao fenómeno da inmigración. Os bos resultados de campañas anteriores fan que este ano se amplíen as sesións a outros niveis educativos. A novidade deste ano, o proxecto piloto Mediador de pares.

A Xunta de Goberno cumpriu cun dos últimos trámites para permitir a posta en funcionamento dun aparcadoiro de bordo en superficie no SUP-6 de Santa Marta: a adscrición á Sociedade Municipal de Xestión do Transporte Urbano (TUSSA) das parcelas destinada a tal fin. A cesión é temporal por un período de catro anos, prorrogables por dous máis.

O Goberno local deu o visto bo, para a súa remisión ao Ministerio de Política Territorial, de dez dos proxectos que serán financiados a cargo do Fondo Estatal para o Emprego e a Sostibilidade Local.

O alcalde compostelán, Xosé A. Sánchez Bugallo, recibiu en Raxoi o director do Centro Galego de Arte Contemporánea (CGAC), Miguel Von Hafe. Este explicoulle os plans que ten para o centro, que dirixe dende o mes de outubro.

O ciclo Sons da Diversidade, organizado pola concellaría de Cultura, celebra o sábado 23 de xaneiro o terceiro concerto da temporada 2009-2010. O Auditorio de Galicia acolle ás 21:00 horas a actuación de Sumrrá, un trío galego que practica o jazz máis innovador. Presenta o seu cuarto disco, no que volven apostar por un son de vangarda, cheo de forza e dramatismo. O prezo da entrada é de 15 euros, con descontos do 50% para menores de 25 anos e persoas xubiladas.

A Concellería de Cultura e Centros Socioculturais e a compañía Chévere, residente na Sala Nasa, desenvolverán nos meses de xaneiro, febreiro e marzo a terceira edición do Obradoiro do Espectador. Trátase dunha actividade que ten por obxectivo achegar o público ás artes escénicas contemporáneas, proporcionándolles aos espectadores coñecementos para unha maior comprensión e diversión.

Unha delegación da cidade italiana de Pisa está a visitar Santiago, coa que está irmandada dende maio de 2009. O obxecto da viaxe é establecer contactos con diferentes estamentos da cidade para concretar unha serie de programas económicos, culturais e turísticos en común.

O Concello do Prat de Llobregar convidou o Concello de Santiago a participar na xornada Os plans de barrio como instrumento de desenvolvemento económico da cidade, que se celebrará o 20 de xaneiro na na localidade catalá. A concelleira da Cidade Histórica, Olga Pedreira, acompañada do xefe de área de Rehabilitación, Fernando Tobío, darán conta do relatorio O proxecto de rexeneración da Cidade Histórica de Santiago de Compostela, co que exporán e explicarán o caso compostelán.

Co obxectivo de fomentar a gastronomía de calidade nos fogares galegos El Corte Inglés, patrocinador do Fórum Gastronómico Santiago 2010, convoca Os pratos da túa vida: I Concurso Galego de Cociña Familiar, cuxa final celebrarase o día 20 de febreiro.

O alcalde compostelán, Xosé A. Sánchez Bugallo, recibiu en Raxoi o ministro de Xustiza, Francisco Caamaño, quen asinou no Libro de Honra do Ano Santo. Un dos temas dos que falaron foi o Xacobeo 2010. O ministro amosou a súa disposición a "facer o posible" polo recoñecemento de Compostela e reivindicou o seu papel como "estrela do Camiño".