Noticias

"A Xunta é consciente de que hai un problema nestes intres", indicou o alcalde compostelán, Xosé A. Sánchez Bugallo, en relación á promoción e programación do Xacobeo 2010. Por isto, reclamoulle a "corrección de enfoques inxustos" que, na súa opinión, van en prexuízo da cidade e do propio Ano Santo.

O alcalde compostelán, Xosé A. Sánchez Bugallo, amosou a súa "moderada satisfacción" polo crecemento no número de pasaxeiros rexistrado no aeroporto de Lavacolla en 2009. "Santiago –indicou- é unha excepción dentro dun retroceso xeneralizado dos aeroportos españois". Atribuíu o éxito, en boa parte, á renovación do convenio con Ryanair.

Como resultado dun minucioso traballo de investigación e compilación de temas tradicionais galegos xorde Ultreia!!!, o último disco da agrupación que leva o mesmo nome e que se presentou no Concello da man da concelleira de Cultura e Centros Socioculturais, Socorro García Conde, e dun dos integrantes do grupo, Emilio Lois. O grupo dará a coñecer este, o seu terceiro disco, ao público compostelán no Teatro Principal a partir das 21:00 horas do sábado 16.

Unha Xunta de Goberno extraordinaria e urxente serviu para tramitar a redacción de tres proxectos dos Fondos Estatais de Inversión Local (FEIL). As obras afectadas son as do complexo polideportivo de Villestro, a recuperación da zona verde no contorno do río Corvo (Salgueiriños) e o centro sociocultural de Santa Marta.

Un total de 237 persoas beneficiouse das 26 accións formativas gratuítas (13 presenciais e 13 por teleformación) desenvolvidas pola Concellaría de Promoción Económica, Emprego, Comercio e Turismo a través do Plan de formación e mellora de competitividade para os sectores industrial, da construción, e do comercio e a hostalería. Plan de Formación 2009.