Noticias

O arcebispo compostelán, Julián Barrio, pechou simbólicamente a Porta Santa, dando así por terminado o Ano Santo 2010, marcado polos milleiros de visitantes e peregrinos chegados a Compostela, e pola satisfacción maioritaria de todos eles polo seu paso pola capital de Galicia.

O presidente da Xunta, Alberto Núñez Feijóo realizou por segundo ano consecutivo a tradicional Ofrenda Nacional ao Apóstolo Santiago coa que se conmemora a translación dos seus restos. O delegado rexio destacou o éxito de visitantes do Ano Santo 2010 e da presenza do Papa Bieito XVI, e pediu ao Santo axuda para superar a crise económica.

En marzo de 2010 o Consorcio de Santiago construíu unha réplica da antiga carraca da Catedral de Santiago e colocouna na torre norte da fachada do Obradoiro. Ante a imposibilidade de conservar a orixinal como instrumento activo, a antiga carraca foi trasladada a un taller de carpintería para a súa restauración e posterior musealización. Dende agora, o vello instrumento pode verse no interior da propia torre, como parte do itinerario da visita ás cubertas da Catedral e ao Pazo de Xelmírez.

Na súa sesión ordinaria de decembro, o Pleno da Corporación aprobou inicialmente o orzamento do Concello e o cadro de persoal para 2011. As contas consolidadas sitúanse nos 117,6 millóns de euros, estimando un superávit inicial de 149.225 euros.

A Concellaría de Xuventude e Festas prosegue coa súa programación para o Nadal. Os máis novos poderán pasar unhas horas de lecer na carpa da praza Roxa o luns 3 e o martes 4 con actividades de cultura urbana gratuítas. Haberá xogos de rol e talleres de recortables tropa Korrigan, Wahammer, Infinity e Carcassone, entre ás 11:30 e as 13:30 horas.

"O problema é que os esforzos se dispersan de modo inversamente proporcional aos resultados", indicou o alcalde compostelán, Xosé A. Sánchez Bugallo, a propósito do reparto de fondos para as liñas de baixo custo realizada pola Xunta de Galicia. Na súa opinión, "non hai unha xustificación razoable" para que "o aeroporto que recibe a maior parte dos usuarios (un 49,5% a mes de novembro) e o 75% do turismo, reciba o 26% das axudas".

O concurso de carteis da imaxe de 2011 para o Festival Internacional de Curtametraxes Curtocircuíto, que convocou a Concellaría de Cultura e Centros Socioculturais, xa ten vencedor. O xurado, composto por membros do Auditorio de Galicia e do equipo do Festival, premiou o traballo feito polo deseñador e ilustrador Uxío Broullón.

O Consorcio de Santiago, no marco das súas políticas de recuperación do patrimonio histórico da cidade, acaba de rematar unha intervención rehabilitadora na balaustrada da terraza do Pazo de Raxoi, edificio neoclásico situado na praza do Obradoiro e que, actualmente, é sede do Concello de Santiago, da Presidencia da Xunta e do Consello da Cultura Galega.

A segunda edición do Nadal Solidario contou de novo coa participación solidaria de centos de composteláns, que se achegaron ata a Casa das Asociacións de Cornes para deixar xoguetes e alimentos non perecedoiros ou para participar no rastrillo alí organizado. Neste participaron 16 comercios e 12 entidades da cidade. Entre este mercado solidario e as doazóns directas recadáronse 4.000 euros en metálico.

A Xunta de Goberno aprobou as bases para a convocatoria de 19 prazas de traballo, no marco da iniciativa Urbana Santiago Norte.