Noticias

O alcalde compostelán, Xerardo Conde Roa, e a concelleira de Parques e Xardíns, María Castelao, visitaron a nova zona verde creada na rúa de Santo Domingo de la Calzada (costa das Camelias), que vén a substituír a cascada existente. Esta área axardinada nace co obxectivo de revitalizar e humanizar o Ensanche.

O Concello e a Cámara de Comercio de Santiago de Compostela entregaron os galardóns da décimo segunda edición dos Premios Manuel Beiras. No acto e recepción estiveron presentes o concelleiro de Normalización Lingüística, Ángel Currás; o presidente da Cámara de Comercio de Santiago, Jesús Asorey; e o vicepresidente da entidade cameral e presidente do xurado dos premios, Evaristo Rodríguez Carracedo; entre outras personalidades do mundo político, empresarial e cultural de Compostela.

Teatro do Noroeste representa o venres 16 e o sábado 17, a partir das 21:00 horas, Último cowboy no Teatro Principal. Dirixida por Eduardo Alonso, enmárcase dentro da programación da Rede Galega de Teatros e Auditorios e está protagonizada por Miguel Pernas e Luma Gómez. Os prezos das entradas que están xa á venda na web de Novagalicia Banco e que poden mercarse na billeteira os días de función son de 7 euros en patio de butacas, platea e primeira planta; 5 euros en 2ª planta; e 3 euros no anfiteatro.

O Consello de Administración de TUSSA, presidido polo concelleiro de Mobilidade, Albino Vázquez Aldrey, os orzamentos da Sociedade para 2012 e acordou a conxelación das tarifas dos aparcadoiros xestionados pola mesma.

As concelleiras de Benestar Social, Paula Prado, e de Medio Ambiente, María Castelao, presentaron na praza do Obradoiro a campaña de reciclaxe Retorna. En Santiago de Compostela, ningún envase ao chan. Esta iniciativa pretende sensibilizar sobre a reciclaxe de envases de plástico, vidro e metal. Ademais, neste caso, o civismo ten premio.

O Hostal dos Reis Católicos acolleu a presentación do libro Las raíces del humanismo europeo y el Camino de Santiago. Esta publicación, coordinada polos profesores da USC Marcelino Agís e Agustín Dosil e o presidente da Fundación Ad Sanctum Iacobum Peregrinatio, Marcelino Oreja, recolle as actas dos X Encontros Internacionais e do Congreso Internacional de Filosofía no Camiño de Santiago de 2010

Tras a reunión mantida coas dúas asociacións comerciais do Ensanche, Acotés e Santiago Centro, o alcalde compostelán, Xerardo Conde Roa, anunciou a creación dunha comisión de estudo que se encargará se trazar as liñas de futuras probas de peonalización nalgunhas rúas desta parte da cidade.

El Óbolo Producciones chega o xoves 15 a Compostela para representar Torvaldo furioso, co que se pecha o ciclo Teatro en Xira, organizado pola Concellería de Cultura. A representación poderá verse no Teatro Principal a partir das 21.00 horas. As entradas, a un prezo de 12 euros en butaca, platea e primeira planta; 8 euros na segunda planta e 6 euros no anfiteatro, xa están á venda na billeteira virtual de Novagalicia Banco. Os días de función poden mercarse na propia billeteira do Principal.

O alcalde compostelán, Xerardo Conde Roa, participou no Palacio de Congresos no acto inaugural da V Xornada Debate do Observatorio Estatal da Discapacidade (OED), que baixo o título "Discapacidade e educación" organizan a Xunta de Galicia e o OED. No encontro, representantes do Ministerio de Educación e da Consellería de Educación, membros del movemento asociativo da discapacidade e profesionais do ensino analizan a situación actual, retos e obxectivos da atención á diversidade no sistema educativo.

A Concelleira de Economía, Comercio, Turismo e Mercados, Reyes Leis, participou na presentación do programa profesional do Fórum Gastronómico 2012, que terá lugar en Santiago de Compostela do 26 ao 28 de febreiro. A concelleira estivo acompañada no Hostal dos Reis Católicos polos directores do Forum Gastronómico, Pep Palau e Jauma von Arend.