Noticias

No marco da programación deseñada con motivo do 800 Aniversario da Consagración da Catedral, o Consorcio de Santiago puxo en marcha o traballo de recuperación da obra artística de Melchor López, cóengo e mestre de capela da Catedral nos séculos XVIII e XIX.

O recoñecido director arxentino Alberto Yaccelini está en Santiago para participar nos Encontros co Público programados por Cineuropa, no seu 25 aniversario. Yaccelini brindará ao público compostelán a oportunidade de falar con el e achegarse ao seu traballo en calquera dos dous coloquios que celebrará, nesta xornada e na do sábado, logo de proxectar o seu último traballo, El fabricante de cepillos, un documental lúcido e inquietante sobre a figura dun antigo nazi. As citas son no Teatro Principal, ás 20:00...

A Banda Municipal de Música de Santiago de Compostela pon en marcha o domingo 20 unha das novidades mais esperadas da programación 2011-2012: o ciclo de Xoves Intérpretes Galegos. Este ciclo inclúe sete concertos nos cales a Banda Municipal contará ao longo de toda a tempada con sete solistas diferentes. O primeiro será Andre Cebrián Garea, de Compostela.

O concelleiro de Medio Rural, Luis Bello, anunciou que xa está en marcha a segunda fase da limpeza das pistas do rural do municipio, tras a primeira fase realizada con carácter de urxencia a finais do mes de agosto. O Departamento tamén está acometendo nestes intres o acondicionamento do lavadoiro e da fonte do lugar de Vilar de Outeiro, en Verdía.

Manuel Lourenzo González é o gañador da XXIX edición do premio de novela longa Eduardo Blanco Amor que este ano organiza o Concello de Santiago e que está dotado con 12.020 euros. Así o decidiu o xurado do premio reunido o 11 de novembro no Teatro Principal cando elixiu a súa obra, presentada baixo o lema ATL. O premio será entregado ao gañador polo alcalde, Xerardo Conde Roa, nun acto que se celebra o 2 de decembro, ás 20:00 horas, na Sala Mozart do Auditorio de Galicia.

A concelleira de Comercio, Reyes Leis, e a directora xeral de Comercio, Nava Castro, presentaron o curso de paquetería creativa e a campaña de escaparatismo que organiza a Fundación Centro Galego da Artesanía e do Deseño, dependente a Consellería de Economía e Industria, en colaboración co Concello de Santiago. O obxectivo destas iniciativas é achegar as claves para dinamizar o pequeno comercio en Compostela.

Un congreso internacional analiza os días 16 e 17 de novembro a problemática da violencia de xénero dende unha perspectiva xurídica. O alcalde compostelán, Xerardo Conde Roa, asistiu ao acto inaugural destas xornadas, que se celebran na Facultade de Dereito

O alcalde de Santiago, Xerardo Conde Roa, e o conselleiro de Educación e Ordenación Universitaria, Xesús Vázquez, asinaron un protocolo de intencións para a xestión do servizo de comedor escolar nos centros escolares da cidade, co fin de garantir a prestación deste servizo. O Concello farase cargo da xestión a partir do curso 2012-2013, coa colaboración financeira da Consellería.

O alcalde compostelán, Xerardo Conde Roa, reiterou en rolda de prensa que "seguimos coa nosa postura" en relación á estación do AVE. "Queremos estación do AVE, pero non nestas condicións", indicou, recordando unha vez máis o asinado no convenio do 3 de novembro de 2009 entre Concello, Xunta e Ministerio de Fomento, así como os incumprimentos de determinados puntos dese acordo.

Na programación de actividades paralelas que Cineuropa organiza nesta XXV edición, nesta xornada, ás 20:30 horas, o Teatro Principal acolle un coloquio sobre o último traballo da directora, Mercedes Álvarez, Mercado de futuros. A cita será co produtor do filme, Xosé Zapata, xa que a realizadora se atopa no Festival de Cine de Florencia, onde compite a súa película.