Noticias

Curtocircuíto ten este ano no festival Wosinc un dos seus socios máis importantes. Durante o noso festival, eles organizarán dous dos concertos que anunciaremos en breve. E, por parte de Curtocircuíto teremos dúas proxeccións moi especiais: unha Noite Curta este mércores 9, a partir das 21:30 horas, e a presentación da primeira película rodada en lingua tuareg xa o xoves en Numax.

O Concello de Santiago de Compostela pon en marcha o xoves 10 de setembro os servizos de comedor e de madrugadores nos seguintes centros de ensino públicos: Apostólo Santiago, Cardeal Quiroga Palacios, As Fontiñas, Roxos-Villestro, Vite, Mestre Rodríguez Xixirei (Lavacolla), Monte dos Postes, Raíña Fabiola, Ramón Cabanillas e, no caso do CEIP Arquitecto Casas Novoa, só o servizo de madrugadores.

O alcalde de Santiago, Martiño Noriega, deu conta dos asuntos tratados na sesión extraordinaria da Xunta de Goberno. Entre eles figurou o calendario de actividades dos centros socioculturais para os últimos meses do ano e varios convenios con entidades sociais.

"Non é un día para moverse en coche e para depender do transporte público", indicou o concelleiro de Medio Ambiente e Convivencia, Xan Duro, a propósito da xornada de concentración de tractores prevista para a xornada deste luns en Santiago. A concentración dende Salgueiriños arrancou ás 14:15 horas, dúas horas máis tarde da hora inicialmente prevista.

O Concello de Santiago colabora na conferencia prevista para o vindeiro xoves, 10 de setembro, da profesora Lucie Sauvé, catedrática de Educación Ambiental na Universidade de Quebec (Canadá). A sesión, titulada "Educación Ambiental e Ecocidadanía: un reto cosmopolítico", terá lugar ás 19:00 horas no auditorio da Biblioteca Pública Ánxel Casal, con entrada de balde.

O día 11 setembro remata o prazo para presentarse ás diferentes liñas de axudas para a dinamización económica e comercial nos barrios ubicados dentro do programa Urbana Norte, proxecto cofinanciado polo Fondo Europeo de Desenvolvemento Rexional (FEDER). Hai catro liñas de axudas distintas dirixidas a persoas emprendedoras, empresas xa en funcionamento e pequenos comercios. Para o conxunto das catro liñas de axudas dedícanse 160.000 euros.

O alcalde de Santiago participou nun encontro en Barcelona cos rexedores da Cidade Condal, A Coruña, Madrid, Zaragoza, Cádiz, València, Iruña e Badalona. O diálogo artellouse en torno a tres eixos temáticos como foro a participación, a vivenda e a comunicación. Ademais plantexouse outro gran eixo más amplo no que os representantes locais partillaron as experiencias das primeiras semanas de goberno, cos éxitos e barreiras atopadas.

Producións Teatrais Excéntricas presenta de novo no Teatro Principal Da Vinci tiña razón!, do dramaturgo Roland Topor. Será con tres funcións este martes e de novo mércores e xoves a partir das 20:30 horas. As entradas poden mercarse no despacho de billetes do Teatro Principal, que está aberto de 18:00 a 21:00 horas.

O Pleno da Corporación aprobou por unanimidade unha declaración institucional relativa á crise humanitaria e ao acollemento das persoas que buscan refuxio en Europa. Na sesión tamén se aprobou unha moción de apoio ao sector lácteo e fixáronse os festivos locais para o ano 2016.

O Concello de Santiago elaborou no verán unha Guía Comercial de Conxo para promocionar os recursos e posibilidades comerciais do barrio. A guía presenta información de interese do barrio, como un mapa orientativo, actividades, os principais monumentos, fitos culturais e patrimoniais ou as súas festas. Ademais, recolle información sobre 177 negocios do barrio, entre comercios, empresas e estabelecementos de hostalería. A guía pode consultarse na web do