Noticias

"Esta é unha situación que non é prorrogable", indicou o alcalde en funcións, Xosé A. Sánchez Bugallo, en referencia ao campamento de protesta instalado na praza do Obradoiro dende hai nove días. Por este motivo, trasladou un requirimento formal para que se poña fin a esta situación e falará deste tema persoalmente co ministro do Interior, Alfredo Pérez Rubalcaba, na xornada do sábado.

O mércores 1 de xuño poñerase en marcha o programa de visitas guiadas á exposición Domus Iacobi. A historia da Catedral de Santiago, situada no Colexio de Fonseca e que conmemora os 800 anos da Catedral compostelá.

O Certame de Danza Intercentros chega xa á súa sexta edición. Será unha oportunidade única para que 187 rapazas e rapaces (nesta ocasión bailarán catro nenos) amosen ao público o froito do traballo en torno á danza realizado ao longo do curso. A cita é o sábado 28 de maio, ás 19:30 horas, no Auditorio de Galicia.

Nos primeiros dez días do Santiago(é)Tapas, entre o 13 e o 22 de maio, consumíronse máis de 18.000 tapas nos 60 establecementos participantes nesta cuarta edición do concurso, enmarcada no 800 Aniversario da Consagración da Catedral. Este dato supón que se consumiron algo máis de 1.800 tapas diarias, que é a mellor media de participación diaria das edicións realizadas ata o momento. O concurso remata o domingo 29 coa previsión de que se manteña este ritmo de consumo.

Inversa Teatro, compañía galega de recente creación fundada por Marta Pérez, volve de novo aos escenarios coa peza A illa das mulleres loucas, dirixida por Vanesa Sotelo. Nesta ocasión a cita terá lugar no Teatro Principal o venres 27, ás 21:00 horas, despois de ter pasado xa polas cidades de Vigo, A Coruña e Lugo.

O alcalde compostelán en funcións, Xosé A. Sánchez Bugallo, reuniuse co arcebispo de Santiago, Julián Barrio, quen en breve será recibido en Roma polo Papa Bieito XVI.

O sábado 28 de maio celebrase a décima edición do Día Nacional da Nutrición, co exercicio físico e a importancia de comer ben como temas de fondo. Con este motivo, a Casa das Asociacións acolle unha charla sobre esta cuestión

O Consorcio de Santiago, no marco das súas políticas de recuperación do patrimonio histórico da cidade, comezou as obras de revestimento da fachada do edificio histórico da praza de Mazarelos que acolle a Facultade de Filosofía. Este revestimento vai devolver o seu aspecto orixinal ao edificio, que a día de hoxe mostra a pedra descuberta.

O alcalde compostelán en funcións, Xosé A. Sánchez Bugallo, compareceu en rolda de prensa para indicar que o seu obxectivo nas vindeiras semanas será propiciar unha "transmisión ordenada das responsabilidades de goberno". Así llo manifestou nunha primeira reunión ao gañador das eleccións municipais do 22 de maio e próximo alcalde, Gerardo Conde Roa.

A Concellería de Educación colabora coa Asociación de Celíacos de Galicia en dar a coñecer esta enfermidade. Así, e con motivo da celebración do Día Nacional do Celíaco o venres 27 de maio, realizouse unha campaña de divulgación nos colexios, co reparto de folletos informativos entre os alumnos de 6º de Primaria dos centros escolares da cidade. O Concello colabora tamén con outras iniciativas, como o concurso Santiago(é)Tapas ou unha campaña nos medios de comunicación.