ALCALDÍA
Sánchez Bugallo e Jean Nouvel presentan o proxecto da Finca do Espiño
O arquitecto Jean Nouvel e o alcalde de Santiago presentaron en rolda de prensa o proxecto de acondicionamento da Finca do Espiño como parque público e de rehabilitación do seu palacete. Esta actuación permitirá recuperar para o goce dos composteláns unha superficie verde de 18.000 metros cadrados e un edificio con máis de cen anos de historia.
CENTROS SOCIOCULTURAIS
Unha exposición conmemora o 250 aniversario do nacemento de Mozart
Cúmprense 250 anos do nacemento de Mozart e o Concello de Santiago tamén o conmemora coa exposición "Mozart e o mundo da música". A mostra, organizada polo Departamento de Centros Socioculturais e a Editorial Everest, estará no Centro Sociocultural das Fontiñas do 5 ata o 30 de maio.
CULTURA
Case 130 guións participan no Compostela Plató
Preto de 130 guións, enviados de todo o territorio nacional, concursan no Compostela Plató, a primeira das actividades que desenvolve o III Festival Internacional de Curtametraxes de Santiago de Compostela, CurtoCircuíto’06.
EMIGRACIÓN
O Concello financiará a estancia de seis anciáns santiagueses no Fogar Español de Montevideo
O alcalde de Santiago, Xosé A. Sánchez Bugallo, asinou un convenio con Fogar Español de Montevideo, para subvencionar a estancia neste centro e sufragar os gastos de manutención, roupa e medicamentos de seis anciáns santiagueses. O Concello facilitará 6.000 euros a esta fin, 1.000 por ancián.
EDUCACIÓN
Os máis pequenos achéganse á Praza de Abastos
Achegar aos nenos e nenas a eses lugares representativos da dinámica da cidade é o obxectivo do programa "Vivir Santiago". Un deses lugares é a Praza de Abastos, que está a acoller a visita de grupos de escolares de Santiago e da comarca, coa fin de ensinarlles o proceso de comercialización dos diferentes produtos ata chegar ao consumidor.
CULTURA
A Orquestra Sinfónica do Principado de Asturias no Auditorio de Galicia
A Orquestra Sinfónica do Principado de Asturias, dirixida polo Maximiano Valdés, ofrece mañá venres un concerto no Auditorio de Galicia. O programa está dedicado integramente a D. Shotakovich.
EMIGRACIÓN
Sánchez Bugallo reúnese cos santiagueses de Montevideo
O alcalde compostelán, Xosé A. Sánchez Bugallo, continúa coa súa viaxe institucional por Arxentina e Uruguai. Na súa primeira xornada en terras uruguayas, asinou un convenio coa Fundación Ramón Rubial "Españois no mundo" para a realización dun censo dos 700 santiagueses residentes neste país. Sánchez Bugallo tamén se reuniu cos santiagueses residentes en Montevideo e que se achegaron á sede do Centro Galego.
CULTURA
Teatro, danza e música na programación cultural do mes de maio
O teatro será unha das actividades máis destacadas da actividade cultural de Santiago do mes de maio, segundo adiantou o concelleiro de Cultura, Néstor Rego, na presentación da programación para as vindeiras semanas. Entre outras representacións e dentro do convenio coa Fundación Caixanova, o escenario do Auditorio de Galicia acollerá o 20 de maio 84 Charing Cross Road, dirixida por Isabel Coixet e que conta no seu elenco con Carme Elías, Josep Minguell e, Mercedes Sampietro.
TRANSPORTE
O transporte urbano do 2020, a debate en Santiago
Expertos internacionais e nacionais debaterán en Santiago sobre o futuro do transporte colectivo nas Xornadas Técnicas sobre Transporte Urbano, que se celebran no Auditorio de Galicia os días 4 e 5 de maio. Asuntos coma o futuro das cidades, as esixencias dos clientes e cidadáns, a oferta tecnolóxica a implantar ou o marco legal e financeiro do sistema de transportes, centrarán o debate.
DEPORTES
O Concurso de Fotografía Deportiva chega á súa décima edición
O Concello de Santiago de Compostela convoca o X Concurso de Fotografía Deportiva, que este ano premiará ó gañador cun premio en metálico de 900 euros. O concelleiro de Deportes, Manuel Portas, presentou esta nova edición do certame, ó que se presentarán fotografías con temas deportivos ou relacionados con calquera faceta ou práctica deportiva, non necesariamente competitiva.