Noticias

Este sábado realizouse o cuarto taller Xoga e aprende con enerxía! a cargo de Marta Gómez, arquitecta experta en enerxía da arquitectura. Este ciclo de obradoiros está dirixido a nenos/as entre os 9 e 12 anos, que a través de divertidos xogos aprenden a aforrar enerxía e a concienciarse na mellora dos espazos nos que habitan.

O CEIP Pío XII realizou unha proposta de Land Art na carballeira de San Lourenzo. Esta iniciativa, enmarcada no Plan Proxecta "12 meses, 12 paisaxes", da Consellería de Cultura, Educación e Ordenación Universitaria, ten como obxectivo fomentar no alumnado o coñecemento e o respecto pola contorna natural cun obxectivo estético, neste caso revalorizando e utilizando a carballeira cun fin artístico e pedagóxico, dende a perspectiva de abrir a escola á cidade.

A Xunta de Goberno deu conta hoxe do decreto do concelleiro delegado de Medio Ambiente e Convivencia polo que se elimina a obriga de abonar unha fianza no caso de solicitudes de ocupación da vía pública. Esa garantía económica é substituída por unha declaración responsable que terán que asinar os promotores, organizadores ou responsables dos actos, na que se comprometen a levar a cabo os arranxos necesarios no caso de producirse danos.

Con motivo da celebración do Día da Educación Viaria o 10 de xullo, o Concello organizou a Semana da Educación Viaria, un programa de actividades que se pechou precisamente este venres cunha xornada sobre seguridade viaria na praza do Obradoiro. Uns 300 rapaces e rapazas de 4º de Primaria participaron nas actividades, ata as que se achegou durante a mañá o alcalde, Martiño Noriega.

Turismo de Santiago, a través do seu servizo para a promoción da cidade a través do sector audiovisual, a Santiago de Compostela Film Commission, participou na primeira edición da Conferencia Española de Turismo Cinematográfico, que se celebrou este xoves en Valladolid.

A compañía andaluza El punto! Danza Teatro chega a vindeira semana a Compostela dentro do circuíto Danza a Escena de La Red de Teatros, Auditorios, Circuítos y Festivales do INAEM. Estarán o xoves 16 de xuño na Sala Agustín Magán, ás 20:30 horas, co seu espectáculo de danza urbana El Olimpo no es aquí.

O concelleiro de Deporte, Rafael Peña, inaugurou esta mañá o circuíto instalado en Salgueiriños no que se desenvolve a décima edición de XiraKarting, xunto con Raquel González, directora da empresa organizadora RGM Eventos, e Román Roo, delegado de Gadisa, principal patrocinador da actividade.

A Banda Municipal de Santiago ofrecerá a todo o seu público dous concertos esta semana: a súa tradicional actuación dos xoves na praza das Praterías, ás 20:00 horas, e un concerto o sábado 11, ás 13:15 horas, no barrio do Castiñeiriño, con motivo das festas de San Antón.

A concelleira de Igualdade, Desenvolvemento Económico e Turismo, Marta Lois, e a directora-xerente en funcións de Turismo de Santiago, Yolanda Ferro, presentaron a DispoApp, unha nova ferramenta electrónica concibida integramente por Turismo de Santiago para poder informar en tempo real nas oficinas de información turística sobre a dispoñibilidade de prazas nos establecementos hostaleiros da cidade.

Xa temos gañadores do concurso #fotolingua, organizado polo Departamento de Lingua do Concello de Santiago para darlle visibilidade aos establecementos comerciais que fan uso do galego. O alcalde, Martiño Noriega, fixo entrega esta mañá dos agasallos nas dúas tendas protagonistas das imaxes vencedoras da campaña.