Noticias

A praza do Obradoiro acolleu este mediodía un minuto de silencio para condenar o último asasinato machista, acontecido esta fin de semana en Córdoba.

O Auditorio de Galicia acollerá os días 26 e 27 de outubro o IV Seminario Internacional Resclima e o II Encontro da REAJA. Trátase dun foro organizado polo Grupo de Investigación en Pedagoxía Social e Educación Ambiental da Universidade de Santiago e pola Rede Internacional de Pesquisadores em Educaçao Ambiental e Justiça Climática (REAJA), que conta coa colaboración do Concello de Santiago.

Este domingo 21 de outubro, en torno ás 7:00 horas, efectivos da Policía Local procederon á detención de catro persoas (tres homes e unha muller) pola súa implicación nun presunto delito de falsificación de moeda e efectos timbrados, durante unha intervención realizada nun establecemento de ocio da cidade.

A agrupación de Protección Civil en Santiago participou na fin de semana en Madrid no I Encontro de Bicicletas Sanitarizadas, organizado por SAMUR-PC. O obxectivo do foro era mostrar o traballo que realizan estas unidades, que no caso de Compostela teñen unha especial relevancia na atención aos peregrinos e peregrinas.

O Boletín Oficial da Provincia publica hoxe a convocatoria de subvencións para a rehabilitación nas ARIS de Vite, Vista Alegre, Cidade Histórica e dos grupos de vivendas Compostela e Cardeal Quiroga, da Pontepedriña. As axudas están dirixidas a comunidades de propietarios que realicen, preferentemente, obras de mellora de accesiblidade e e eficiencia enerxética. O prazo para solicitar as axudas é dun mes, e a data máxima de xustificación da subvención rematará o 31 de outubro de 2019.

A Real Filharmonía de Galicia inaugurará o vindeiro venres, 26 de outubro, a tempada 2018-2019 do XLVI Ciclo de Grandes Autores e Intérpretes da Música, promovido polo Centro Superior de Investigación e Promoción da Música da Universidade Autónoma de Madrid. Será no Auditorio Nacional de Madrid, ás 19:30 horas.

O Departamento de Comercio abre o prazo para solicitar a participación no Mercado de Nadal, que se celebrará do 1 de decembro ata o 5 de xaneiro na rúa da Carreira do Conde. A inscrición estará aberta ata as 19:00 horas do día 5 de novembro.

A Xunta de Goberno acordou hoxe aceptar unha subvención da Consellería de Economía, Emprego e Industria para a posta en marcha do Obradoiro de Emprego "Creas". A axuda será de 288.807 euros, e o Concello cofinanciará o programa cunha achega de 60.000 euros.

O edil de Educación e Cidadanía, Manuel Dios, presentou esta mañá unha nova guía didáctica dentro da colección Coñecer Santiago, cidade educadora. Desta vez leva por título O cemiterio compostelán de Boisaca e o patrimonio funerario e está coordinada pola profesora Carmen María Sánchez. Na rolda estiveron algúns dos autores e autoras da publicación.

O alcalde, Martiño Noriega, recibiu hoxe no Pazo de Raxoi unha delegación de embaixadores e embaixadoras da Unión Europea en España, que están de visita oficial en Galicia. A delegación estivo encabezada por Christian Ebner, embaixador de Austria, país que exerce a presidencia de turno do Consello da Unión Europea.