Noticias

O alcalde compostelán, Ángel Currás, recibiu o presidente do Padroado do Museo do Pobo Galego, Xusto Beramendi González, e ao director do Museo, Carlos García Martínez, cos que falou sobre o plan director desta institución.

O Boletín Oficial da Provincia (BOP) do 11 de novembro publicaba a apertura do procedemento aberto de contratación das obras de contratación do centro cívico no Romaño-Vista Alegre. O tipo de licitación é de 775.000 euros e o prazo de execución de 10 meses.

A concelleira de Mercados visitou o Recinto Feiral de Amio con representantes dos gandeiros para analizar coa concesionaria o estado de execución das obras que se lle demandaran durante o verán. Reyes Leis confía en que estes traballos estean realizados antes de finais de ano.

As concelleiras de Urbanismo, María Pardo, e de Benestar Social, María Castelao, asistiron á inauguración do curso técnico sobre "Accesibilidade universal aplicada", organizado polo Colexio de Enxeñeiros de Camiños, Canais e Portos de Galicia e que se celebra na Escola Galega de Administración Pública (EGAP). Nas súas intervencións, as concelleiras explicaron a experiencia municipal en accesibilidade nos espazos públicos.

A rehabilitación do antigo Banco de España como sede do Museo das Peregrinacións e de Santiago foi galardoada na última edición da Bienal Española de Arquitectura e Urbanismo, correspondente ao bienio 2011-2012. Os premios entréganse este xoves, 14 de novembro, no Centro de Creación Contemporánea "Matadero" de Madrid, ás 18:30 horas. Coincidindo coa entrega dos galardóns, inaugurarase unha exposición itinerante con todas as obras premiadas. O certame é unha iniciativa do Ministerio de Fomento,...

Despois das catro funcións da semana pasada, teremos outras catro de Sigue buscando con Funboa Escénica. Será dende este xoves e ata o domingo 17 ás 20:30 horas, a excepción do domingo, que é ás 19:30 horas. O prezo para as funcións é de 8 euros, a excepción do xoves, día do espectador, que é a 6 euros. As entradas poden mercarse na billeteira do Teatro Principal e na propia Zona C os días de evento.

Este xoves 14, nova cita co ciclo Íntimo & Acústico da man de Coque Malla, que chega a Compostela para presentar o seu novo traballo, Mujeres. Será ás 21:00 horas na Sala Capitol, nun evento que se enmarca tamén dentro de Cineuropa Concerto. As entradas, a 15 euros (18 o propio día do concerto) poden mercarse na billeteira do Teatro Principal, en Ticketmaster, A Reixa Tenda e salacapitol.com.

Incorpórase un novo filme a Cineuropa, Unha familia de Tokio, gañador da Espiga de Ouro de Valladolid. Poderá verse este xoves, ás 23:15 horas, no Salón Teatro, e de novo os días 17 e 18. Este filme vén substituír no calendario a Enemy, de Denís Villeneuve, que caeu do cartel por problemas coa xeración da copia dixital. Dende a organización laméntase que non se poida ver Enemy e pídense desculpas polas molestias causadas.

O alcalde de Santiago, Ángel Currás, xunto coas concelleiras de Turismo, Reyes Leis; Facenda, Cecilia Sierra; e Urbanismo, María Pardo, mantiveron hoxe no Pazo de Raxoi unha reunión de traballo co presidente da Cámara de Comercio de Santiago, Jesús Asorey e co presidente da Asociación de Empresarios do Polígono do Tambre, Jesús Chenel, na que analizaron as principais demandas e necesidades destes colectivos, co fin de afincar as liñas de colaboración cara o futuro.