Noticias

O alcalde de Santiago, Agustín Hernández, anunciou a adxudicación pola Xunta de Goberno das obras de renovación da avenida Quiroga Palacios, desde a avenida de Lugo ata a rúa de Belvís, nas inmediacións do Seminario Menor. Os traballos terán un custo de 546.614 euros e un prazo de execución de seis meses.

A Xunta de Goberno aprobou as bases reguladoras e a convocatoria para a concesión de bolsas de comedor escolar para o curso 2015/2016, dirixidas ao alumnado de centros docentes públicos e privados concertados de educación infantil (segundo ciclo) e de educación primaria obrigatoria do Concello de Santiago. O prazo de presentación de solicitudes é de 15 días naturais, contados a partir da publicación da convocatoria no BOP.

Rematado o prazo de solicitude de renovación das concesión establecidas en 2013, a Xunta de Goberno acordou asignar o uso das 39 hortas municipais de Fontiñas-Cotaredo. O uso dos terreos é por dous anos, con posible prórroga anual ata un máximo de 4 anos.

Deuse conta na Xunta de Goberno da sinatura dun novo acordo bilateral coa Xunta de Galicia, no marco das liñas de financiamento previstas polo Ministerio de Fomento no marco do Plan estatal de fomento do alugueiro de vivendas, rehabilitación edificatoria e rexeneración e renovación urbanas 2013-2016. Esta nova fase, a número 13, permitirá a rehabilitación de 21 vivendas na Área de Rexeneración e Renovación Urbana do Casco Histórico, cun custo total de 425.846 euros

Con motivo da próxima celebración do Día das Letras Galegas, a Concellería de Normalización Lingüística organizou no Teatro Principal a representación do espectáculo Escoitando a Filgueira Valverde, nunha sesión especialmente dedicada ao alumnado de secundaria dos centros composteláns e na que participaron 275 estudantes.

O alcalde de Santiago, Agustín Hernández, e a conselleira de Traballo e Benestar, Beatriz Mato, clausuraron o Foro da Intermediación e o Emprego, celebrado este mércores e xoves no Palacio de Congresos. Esta edición contou coa participación de 3.000 persoas nas 62 actividades de formación e de intercambios. Ademais, ofertáronse 200 postos de traballo polas 63 empresas presentes, para os que se apuntaron máis de 8.000 persoas.

Kitty, Daisy & Lewis volven cun novo álbum, The third, tres anos despois do seu aclamado Smoking in heaven. O venres 15 de maio estarán na praza da Quintana dentro do programa das Festas da Ascensión. A entrada será libre ata completar aforo.

Este sábado 2 de maio hai unha nova cita co programa Imos ao baile. Será na Casa das Asociacións de Cornes ás 17:00 horas.

O Consorcio de Santiago licita o remate das obras do que será o primeiro Centro Nacional de Formación de Referencia en Materia de Rehabilitación que existirá en España, situado na antiga fábrica de curtidos de Pontepedriña de Arriba, en Santiago de Compostela. A obra sae a concurso por un importe de 1.213.918,51 euros. As empresas interesadas poderán presentar as súas ofertas ata o 26 de maio.

En novembro concluía a xira Soltad a los perros, de José Ignacio Lapido e Quique González, cun éxito de crítica e público que deixou a moitos seguidores con gañas de máis. Poucas semanas despois, Quique González púxose de novo na estrada para percorrer España. Unha xira moi especial durante a que está actuando en teatros e salas de aforo reducido sen máis compañía que a da súa guitarra e a súa harmónica. Así, chega este venres 1 de maio a Compostela,...