Noticias

O venres 26 de abril cumpriranse 10 anos dende a inauguración e posta en marcha do Centro Sociocultural da Trisca, emblemático e moderno edificio deseñado polos arquitectos Jonh Hejduk, Antonio Sanmartín e Elena Cánovas. Para celebralo, a Concellería de Centros Socioculturais, en colaboración coas entidades do barrio, preparou un completo programa de actividades do 24 ao 27 de abril.

O ciclo Sons’13 trae de novo a Compostela a Budiño, que actuará o xoves 25, ás 21:00 horas, no Teatro Principal. O prezo das entradas é 10 € (anticipada) e 12 € (billeteira), e pódense mercar na billeteira do Teatro Principal, en entradas.novagaliciabanco.es e no 902 434 443.

O pavillón do Restollal acolle a segunda edición do Curso de Defensa Persoal Feminina organizado polo Compostela Judo Club coa colaboración do Concello de Santiago. As sesións desenvolveranse os venres, de 21:00 a 22:00 horas, ao longo do vindeiro mes e medio. Aínda quedan prazas neste curso, no que participarán unhas 30 mulleres, a maioría con idades comprendidas entre os 20 e os 35 anos.

A concelleira de Educación, María Castelao, asistiu no CEIP Apóstolo Santiago ao comezo dos obradoiros Creando en Igualdade, que realiza o alumnado de 5º e 6º de primaria. Estas sesións enmárcanse no III Plan de Igualdade.

A concelleira de Economía, Reyes Leis; o xerente de Área Central, Juan Carlos Losada; e a responsable da nova asociación empresarial AJE Santiago, Carmen López, presentaron a terceira edición en Santiago de Getting Contacts!, organizada polo Concello dentro do programa Santiago Investors Support, coa colaboración de AJE Santiago e Área Central, e que se celebrará o 30 de maio en Área Central a partir das 9:30 horas.

A concelleira de Facenda, Cecilia Sierra, reiterou que o endebedamento do Concello, tal como se indica no informe da liquidación do orzamento de 2012, alcanzou o mínimo "histórico" dos 60,5 millóns de euros. A este respecto, a edil explicou que hai unha "diferencia de criterio" na información publicada polo Ministerio de Facenda que cifra esta débeda en 63,8 millóns de euros.

O Equipo de Dinamización Social Urbana Santiago Norte realizou o segundo obradoiro de iniciación á Informática no Centro Comunitario Xoán XXIII. Neste obradoiro, que pertence ao programa Competencia Social e Crecemento Persoal, as persoas participantes son preparados nos conceptos básicos da informática para poder navegar por Internet.

O alcalde compostelán, Ángel Curras, recibiu en Raxoi un grupo de turoperadores xaponeses, interesados en potenciar a relación turística entre o mercado nipón e Santiago.

O concelleiro de Centros Socioculturais e de Participación Cidadá, Francisco Noya, presentou as novas rutas didácticas para o período de abril a xuño de 2013 do proxecto educativo Cultura Viva. Fai túa Compostela. Esta é a continuación da segunda edición deste programa, que se iniciou en febreiro coas primeiras 17 rutas. Con estas últimas rutas, terán participado no programa máis de 1.000 persoas.

O alcalde, Ángel Curras, e a concelleira de Turismo, Reyes Leis, recibiron no Pazo de Raxoi os participantes no "educational tour" do Proxecto Certo, financiado pola Unión Europea, no que participan profesores e touroperadores procedentes de Noruega e Italia.