CULTURA
"Camiño a Guantánamo" inaugura o ciclo Cinema e Dereitos Humanos
Un ano máis, chega en xaneiro o Ciclo Cinema e Dereitos Humanos ao Teatro Principal. Celebrarase do 7 ao 11, ambos incluídos, en dous pases ás 20:15 e ás 22:15 horas, organizado pola Concellaría de Cultura. O filme que inaugura o ciclo é Camiño a Guantánamo, de Michael Winterbottom e Mat Whitecross, premiado co Oso de Prata do Festival de Berlín no 2006.
ALCALDÍA
Sánchez Bugallo prevé un 2008 de "restricións" polo descenso dos ingresos por ventas patrimoniais
Na súa habitual rolda de prensa dos venres, o alcalde compostelán, Xosé A. Sánchez Bugallo, indicou que o Goberno municipal segue a traballar na elaboración dos orzamentos municipais para 2008. Neste sentido, anticipou que "o 2008 será un ano de restricións" para uns orzamentos que deben "encaixar un escenario económico máis complexo que nos últimos anos".
ALCALDÍA
O alcalde propón un pacto polo civismo
O Concello convidará a representantes de diferentes ámbitos e sectores da cidade a formar parte dun Foro polo Civismo, segundo anunciou o alcalde. O obxectivo é que este foro sexa o voceiro das propostas municipais que se formulen para atallar as consecuencias derivadas do botellón.
URBANISMO
Compostela estará presente na Conferencia Internacional de Cidades Vivas
A concelleira de Urbanismo, Mercedes Rosón, viaxará a Sevilla os días 9, 10 e 11 de xaneiro para representar a Santiago no Foro Cidade Viva que organiza a Dirección General de Arquitectura y Vivienda da Junta de Andalucía. O encontro enmárcase dentro da reunión anual da Rede do Coñecemento cara unha Cidade Sostible, formada por persoas e institucións vinculadas con proxectos de planeamento urbano en cidades de Europa, América Latina e o Mediterráneo.