Noticias

Agosto segue a ser un mes cheo de música en Compostela, grazas a "Feitoamán". O festival trae o venres 18 dúas novas propostas musicais, Leo Giannetto’s Jazz Project e Fredy Fevereiro.

Por mor da choiva, o espectáculo "Galicia Máxica", que se viña representando no Paseo de central da Alameda ás 22:45 horas, adianta a hora de inicio para as 21.00 horas e trasládase para o Teatro Principal.

Os días 26 e 27 de agosto Santiago de Compostela será a referencia do fútbol base de Galicia e do Norte de Portugal coa disputa da fase final da primeira edición da Copa Gallaecia para as categorías sub-17.Esta competición, ideada pola Fundación Compostela deporte,botou a andar no pasado mes de maio coa disputa da fase previa, na que tomaron parte as seleccións das sete cidades galegas: Ferrol, A Coruña, Santiago, Lugo, Pontevedra, Vigo e Ourense e as portuguesas de Porto, Braga, Viana, Bragança e Vila Real.

O alcalde de Santiago, Xosé A. Sánchez Bugallo, anunciou que o vindeiro ano 2007 o día de San Roque volverá a ser non laborable na cidade. Pouco despois de participar na tradicional homenaxe ao santo, lembrou que a non festividade desde ano obedeceu unicamente a "circunstancias excepcionais".

Se a chuvia o permite, o circo, os malabares e o clown seguirán enchendo as rúas e prazas de Compostela nunha nova xornada do Festival d’Gorra. O xoves 17 repiten varios dos artistas que actuaron en días pasados e debutan dúas novas compañías, Shampoo e Mejunje.

"Feitoamán" segue a encher de música as noites do casco antigo. Para o xoves 17 está prevista outra intensa sesión de jazz ás 22:30 horas.

Á vista das condicións meteorolóxicas e da extinción total dos incendios de Compostela, levantouse o dispositivo de emerxencia que durante doce días mobilizou a Policía Local, Bombeiros, Protección Civil, Cruz Vermella e empresas municipais. O balance provisional deixa un resultado dunhas 830 hectáreas queimadas, case o 4% da superficie municipal.

Unha nova xornada do Festival d’Gorra trae ás rúas e prazas de Compostela máis malabares, escapismo e clown. Abrirá a xornada, ás 17.30 horas na Quintana, Kote, un dos referentes galegos no mundo dos malabares e do espectáculo de rúa.

"Feitoamán" engádese á ampla oferta musical da cidade para o mes de agosto. As rúas e prazas da cidade histórica son escenario da actuación de dez formacións ata o 3 de setembro. O evento, organizado pola Concellería de Cultura e pola Asociación Cultural de Cidade Vella, contará o mércores 16 coas actuacións dos Fabulosos Cubatas de Fockink Brothers e do Xacobe Martínez Antelo Quinteto.

A unhas 830 hectáreas ascende a superficie queimada ata o momento no municipio, segundo indicou o alcalde, Xosé A. Sánchez Bugallo. O balance do pasado fin de semana deixou unhas 150 hectáreas arrasadas nun total de 43 incendios, dos que oito eran novos e o resto reactivacións doutros existentes. En virtude dos cambios meteorolóxicos anunciados, está previsto que se levante o dispositivo de emerxencia o mércores 16.