Noticias

Unha delegación da cidade de Santiago de los Caballeros (República Dominicana) foi recibida en Raxoi polo alcalde compostelán, Xosé A. Sánchez Bugallo. Na xuntanza cursáronlle a invitación para asistir a un congreso que reunirá nesta cidade americana, en outubro, ás cidades do mundo que levan o nome de Santiago.

Un ano máis, a Santiago de Compostela Film Commission participará no AFCI Location Trade Show, que se celebrará en Santa Mónica (California) entre os días 10 e 12 de abril.

Unha nova publicación, co título de Marzo, mes do comercio, recolle as principais actividades que se desenvolveron en 2008 baixo este lema: III Gala do Comercio Compostela Capital de Compras, II Compostela Outlet e o ciclo de Conferencias sobre a Comunicación e Innovación para o pequeno comercio".

O Goberno local aprobou inicialmente o proxecto de urbanización do SUP-1 de Romero Donallo. Este novo polígono de vivendas, deseñado por César Coll, suporá unha singular e moderna conexión estética e urbanística entre o tradicional e o novo Ensanche.

A Xunta de Goberno aprobou a realización de obras no pavillón polideportivo de Santa Isabel. En concreto, trátase dun investimento de 200.315 euros para a instalación dun novo pavimento de parqué que substituirá ao actual.

O proxecto "Aidants Familiaux" (coidadores familiares) está dirixido á promover accións que faciliten a inserción laboral dos coidadores familiares. O Concello quérese sumar a esta iniciativa e participará na mesma con varias accións, para as cales a Xunta de Goberno aprobou un orzamento de 71.911 euros (46.950 euros de subvención do Fondo Social Europeo e 24.961 de achega propia).

Do 14 ao 18 de abril terá lugar na sede da Fundación Caixa Galicia (rúa do Vilar, 19) a segunda parte do ciclo Conferencias sobre Comunicación e Innovación para o pequeno comercio, organizadas pola Concellaría de Promoción Económica, Emprego, Comercio e Turismo. Este segundo bloque componse de cinco charlas gratuítas programadas no conxunto de actividades deseñadas baixo o lema Marzo, mes do comercio.

Despois de moitas horas falando, a última hora da noite do venres 4 concluíron con éxito as negociacións mantidas entre o Concello, representado polo concelleiro de Mercados, Carlos Nieves, e os gandeiros, co fin de solucionar o conflito que os mantiña protestando no recinto feiral de Amio. Deste xeito, a feira Expovivenda celebrarase sen ningunha dificultade, e Concello e tratantes crearán unha comisión para acordar o calendario de feiras anuais.

Mérida acolleu o sábado 5 de abril a celebración da Asemblea ordinaria do Grupo de Cidades Patrimonio da Humanidade de España, á que acudiu o alcalde compostelán, Xosé A. Sánchez Bugallo. Ao encontro asistiron tamén os alcaldes de Cuenca, Ávila, Tarragona, Toledo, Cáceres, Ibiza, Salamanca e Mérida, e os concelleiros das outras catro cidades máis que integran o grupo, que son Alcalá de Henares, San Cristóbal de la Laguna, Segovia e Córdoba.

Dous grupos de alumnos do CEIP de Vite foron os protagonistas da conmemoración un ano máis do Día da Árbore e do Día Mundial da Auga. Con tal fin, o Concello organizou unha visita ao acueduto da Ponte Mantible e unha plantación de árbores en Salgueiriños.