Noticias

O escritor brasileiro Paulo Coelho está de visita en Compostela para recibir a homenaxe polo seu labor de divulgación da cidade e do Camiño, unha rota que "cambiou a miña vida", segundo dixo tras asinar no Libro de Honra da Cidade.

A Xunta de Goberno acordou a concesión da licenza municipal de construción e apertura do edificio no que se levantará o futuro centro comercial das Cancelas. O custo do proxecto é de 34 millóns de euros.

A Concellería de Mobilidade e Seguridade Cidadá autorizou a celebración de 132 cacharelas e sardiñadas na noite de San Xoán, o 23 de xuño.

A Unidade Municipal de Atención a Drogodependencias (UMAD) foi convidada a participar no Programa de acción comunitaria no ámbito da saúde 2008-2013. Esta rede está coordinada pola rexión italiana de Veneto e integrada tamén polos municipios de Solna e Huddinge (Suecia), Letonia, a Deputación de Barcelona, Rumanía, Austria e Hungría.

O martes 24, a concelleira de Medio Ambiente e Desenvolvemento Sustentábel, Elvira Cienfuegos, presidirá unha nova reunión do Consello Municipal do Medio Ambiente. Será ás 20:00 horas. no salón circular do Auditorio e á mesma están convocados os seus membros, representantes de diferentes sectores cidadáns como: asociacións ecoloxistas, grupos de defensa dos animais, asociacións veciñais, asociacións de empresarios, expertos en temas medioambientais, da Universidade, organizacións políticas...

Continúan na cidade as actividades que a Concellaría de Cultura organiza con motivo do 100 aniversario da morte de Curros Enríquez. Así, o martes 24 celébrase unha conferencia, que impartirá Pilar García Negro, e un concerto no Teatro Principal baixo o nome Na fronte unha estrela. Ambas actividades, ao igual que todas as desta homenaxe, son de entrada libre e de balde.