Noticias

A alcaldesa de San Salvador (El Salvador), Elvia Violeta Menjívar, recibiu de mans do alcalde compostelán e presidente do Consorcio, Xosé Sánchez Bugallo, o Premio Santiago de Compostela de Cooperación Urbana, dotado con 180.000 euros. O proxecto da praza San Esteban do centro histórico desta cidade centroamericana fora seleccionado entre un total de 24 proxectos presentados. Grazas ao galardón recuperarase un lugar simbólico para o seu uso público.

O Teatro Principal acolle un novo concerto didáctico programado pola Concellería de Educación. Será o mércores 28 de novembro, ás 10.30 horas, e o protagonista será Nuke Trío, unha formación composta por clarinete baixo, guitarra e zanfoña.

O Colexio de Fonseca alberga ata o 2 de decembro a exposición "Galicia no gravado antigo", 270 gravados da Colección Puertas Mosquera seleccionados dun total de máis de 800 do século XIX, dos que unha parte moi importante corresponden á cidade de Santiago. Esta mostra convértese agora en libro-catálogo.