BENESTAR SOCIAL E MULLER
Convócanse axudas para o fomento do movemento asociativo e de defensa da muller
O Goberno local aprobou as bases e a convocatoria de subvencións para o fomento do movemento asociativo e de defensa da muller para o ano 2008. Destínanse 25.000 euros a estas axudas
CULTURA
Subvencións para entidades sen fin de lucro
Veñen de aprobarse as bases da convocatoria de subvencións a entidades sen fin de lucro no ámbito cultural. A contía que se destina a esta finalidade son 45.000 euros.
DEPORTES
Nova pista para o pavillón de Santa Isabel
O Goberno local adxudicou as obras de substitución do pavimento deportivo de madeira no pavillón polideportivo de Santa Isabel, por importe de 151.000 euros e un prazo de execución dun mes e medio. O obxectivo é que a nova pista poida estar lista para o comezo das novas tempadas das diferentes competicións deportivas que alí se desenvolven.
INFRAESTRUTURAS
Máis de medio millón de euros para obras de limpeza das pistas do rural, rúas e beirarrúas
O Goberno local aprobou diversas obras a acometer nos vindeiros meses en varias rúas e beirarrúas da cidade, así como actuacións de limpeza e desbroce de cunetas das pistas do Concello. En total, entre tres adxudicacións, supérase o medio millón de euros de investimento.
MEDIO AMBIENTE
Proxecto para por en valor as carballeiras e fontes
A Concellería de Medio Ambiente solicitará da Axencia Galega de Desenvolvemento Rural (AGADER) unha subvención de 145.650 euros para acometer actuacións de restauración e posta en valor das carballeiras públicas de Nemenzo e Mourentán, do espazo de lecer en Verdía, e para a restauración de fontes en lavadoiros en Os Vilares, Garabal, A Sionlla, Aríns e Vilamaior. O orzamento total é de 224.077 euros e solicítase a subvención do 65% do custe total do proxecto.
CIDADE HISTÓRICA
A Calzada de Sar achegarase ao seu aspecto orixinario
O Consorcio de Santiago vai acometer a restauración da Calzada de Sar. Para iso, investirá 800.000 euros nun proxecto que foi aprobado pola Xunta de Goberno e que está pendente do informe de Patrimonio.
URBANISMO
O Concello dá o visto bo ás valoracións da expropiación da Casa do Cabildo
A Xunta de Goberno tomou en coñecemento o prezo fixado pola Comisión pericial de expertos para a expropiación da Casa do Cabildo, que ascende a 2.289.170 euros. Esta cantidade será aboada polo Consorcio de Santiago, que asumirá o inmoble a fin de rehabilitalo.
CULTURA
Unhas 4.000 persoas viviron de preto o clown e a música na primeira fin de semana do Festival dos Abrazos
O circo e a música foron os protagonistas da primeira fin de semana do Festival dos Abrazos, organizado pola concellaría de Cultura e a Consellería de Cultura da Xunta. O Festival encheu de xente as prazas do Toural, da Pescadería Vella, da Quintana e de San Martín Pinario, así como a rúa Vía Sacra, a Zona "C" e a igrexa de Santa María do Camiño, onde Emilio Cao achegou a arpa celta a unhas 300 persoas, coas súas intervencións de 40 minutos Co mar no meu peto.
ALCALDÍA
Sánchez Bugallo: "O apoio da Xunta á presenza en Xangai implica que se converte nun proxecto do conxunto do país"
O alcalde compostelán, Xosé A. Sánchez Bugallo, valorou moi positivamente o balance do acontecido durante o mes de xullo na cidade en diversos ámbitos. Así, expresou a súa satisfacción por cuestións como o respaldo do Consello da Capitalidade á presenza de Santiago na Expo Xangai 2010, a aprobación do texto definitivo do Plan Estratéxico ou o avance de infraestruturas coma o paso inferior do Hórreo ou o segundo tramo do colector xeral.
URBANISMO
Novo recoñecemento internacional para Santiago polo seu crecemento urbano nos últimos 25 anos
O alcalde compostelán, Xosé A. Sánchez Bugallo, anunciou a concesión a Santiago , por parte da Fundación pola Arquitectura, do Premio Europeo Philippe Rotthier 2008 á Mellor Calidade de Ampliación da Cidade nos últimos 25 anos. O premio entregarase o 18 de outubro en Bruxelas (Bélxica).
