Noticias

O compromiso co cinema galego do Festival Cineuropa 2008 continúa certificándose xornada a xornada. Na tarde do venres 21 de novembro, no Teatro Principal, estrearase oficialmente a longametraxe documental Flores tristes, dirixida polo cineasta coruñés Manuel Abad.

Trinta persoas, das 75 que participan no Proxecto Crear V, accederon ao mercado laboral dende que a Concellaría de Promoción Económica e Emprego empezou a desenvolver o programa, o día 15 de setembro. Esta cifra representa o 40% do total, e é cinco puntos superior aos obxectivos de inserción fixados pola Xunta de Galicia ao remate do programa, que son de 26 participantes, o 35% do total. Está previsto que o programa remate o 31 de outubro do 2009.

A concelleira de Benestar Social e Muller, Mar Martín, presentou a curtametraxe Buxaina, realizada polos usuarios da Unidade Municipal de Atención ao Drogodependente (UMAD), actividade que se inclúe no programa socieducativo do centro.

O director arxentino Pablo Trapero recibiu de mans do alcalde, Xosé A. Sánchez Bugallo, o Premio Cineuropa 2008 en recoñecemento á súa traxectoria. Tras a gala de entrega, presentada pola actriz Camila Bossa e amenizada polo Cuarteto de Chelos da Real Filharmonía de Galicia, proxectouse o último filme do realizador, Leonera.

O concelleiro de Promoción Económica, Emprego, Comercio e Turismo, Xosé Manuel Iglesias, presentou a III Xornada Emprende en Compostela, que se celebrará o 2 de decembro no Pazo de Exposicións e Congresos de Galicia. O obxectivo da xornada, enmarcada no programa Compostela Activa, é fomentar a cultura emprendedora mediante un encontro no que participan distintas organizacións vinculadas ao emprendemento e ao desenvolvemento do emprego en Santiago.

O alcalde compostelán, Xosé A. Sánchez Bugallo, presidiu na Casa do Concello o Consello de Relacións Veciñais. Nesta reunión, os veciños foron informados dos plans municipais en canto a dotación de solo industrial previstos no recentemente aprobado Plan Xeral de Ordenación Municipal (PXOM) e dos que xa están en marcha.

"Achégate! é o título dunha exposición itinerante que amosa os proxectos levados a cabo no Sur pola Cooperación Galega. O alcalde compostelán, Xosé A. Sánchez Bugallo, visitou esta mostra no seu paso por Santiago, acompañado pola directora xeral de Cooperación Exterior da Xunta, Fabiola Sotelo.

Na xornada do xoves 20 de novembro chega á pantalla do Teatro Principal Blindness, un dos filmes máis agardados da tempada cinematográfica. O Festival Cineuropa ofrece aos afeccionados ao cinema de Compostela a oportunidade de gozar da última creación de Fernando Meirelles, autor, entre outros filmes, de Cidade de Deus.

O concelleiro de Transportes, Carlos Nieves, presentou as novas tarifas de auto-taxi para 2009, aprobadas pola Xunta de Goberno. A tarifa mínima por quilómetro percorrido durante o día queda en 0,86 euros, quedando a baixada de bandeira en 3,25 euros. A suba media das tarifas é dun 4,3%.

A Xunta de Goberno local aprobou a realización de obras de mellora nos vieiros de tres parroquias: San Marcos, Villestro e Marantes. Entre os acordos adoptados figura tamén o estudo e recuperación da muralla medieval da cidade ou a asignación a dúas novas rúas de San Lázaro dos nomes de Xosé Castro González "Chané" e Avelino Pousa Antelo.