Noticias

Un ano máis, os alumnos do Curso Universitario Internacional Música en Compostela, pasaron pola Casa do Concello. A edición número 52 desta recoñecida actividade remata o sábado 15 de agosto despois de dúas semanas de leccións e concertos para máis de 120 alumnos de 18 países.

O Servizo de Intermediación Laboral da Concellaría de Promoción Económica e Emprego ten no seu aplicativo informático, denominado Plataforma de Intermediación Laboral, 2.643 persoas inscritas. No primeiro semestre de 2009, o servizo recibiu 817 novas solicitudes. Destas persoas, 472 son mulleres, o que representa o 70% do total.

Continúan a bo ritmo as obras da rúa do Olvido e do seu contorno, incluídas nos Fondos de Investimento Local. Esta actuación comunicará a zona de Belvís co Ensanche compostelán e permitirá eliminar beirarrúa actual de formigón para substituíla por lousas de pedra. Ademais, construirase un aparcadoiro soterrado.

O Festival dos Abrazos propón para o venres 14 un día de contrastes musicais. Na Igrexa de Santa María do Camiño, ás 13:00 e ás 20:00 horas, a intérprete chinesa Meng Wang achegaranos ao son oriental máis antigo a través do guzheng, un instrumento tradicional do seu país. Pola noite, ás 23:30 horas, diante da Zona "C", no parque de Bonaval, unha nova sesión de Abrazos Dixitais, na que Dj Floro exprimirá todas as posibilidades da mesa de mesturas.

O Programa de Educación de Rúa, promovido pola Concellería de Benestar Social, segue coas súas actividades. Desta vez, a rúa Berlín, fronte a Área Central, en Fontiñas, acollerá o venres 14, de 16:00 a 20:00 horas, un Encontro Interxeracional de Xogos Internacionais.

Ata o 30 de agosto permanecerá aberta na igrexa da Universidade a exposición Chaplin en imaxes. Tamén ata esa data continúan desenvolvéndose visitas didácticas a esta mostra. O xoves 13 de agosto, ás 11:30 horas, tocaralles aos nenos e nenas da colonia de verán do Colexio Santa Apolonia.

A concelleira de Cultura e Centros Socioculturais, Socorro García Conde, realizou unha visita ás obras de ampliación, mellora e acondicionamento do Centro Sociocultural de Laraño. Durante a visita estivo acompañada de representantes da Asociación de Veciños, do arquitecto e dos xefes de obra.

O Festival dos Abrazos está a converter por segundo ano a Praza das Praterías no mellor escenario para as diferentes disciplinas circenses, con citas todos os martes e xoves. Son propostas para todos os públicos e deseñadas pensando de xeito especial nos máis pequenos. Teñen, ademais, un obxectivo dobre, por unha banda, amosar os espectáculos máis innovadores do novo circo galego e, pola outra, achegar a Compostela as tendencias noutros países e noutras culturas.

A exposición fotográfica Compostela natureza levará o verde á cidade vella compostelán durante todo o mes de agosto. Trátase dunha mostra de vinte imaxes captadas nos diferentes parques e xardíns de Compostela polo fotógrafo Fuco Reyes.

O Festival dos Abrazos acolle o mércores 12, en sesión dobre, ás 13:00 e ás 20:30 horas, a nova peza de Mercé de Rande, Concerto solo (regando as raíces). Neste espectáculo, que terá lugar diante da igrexa Bonaval, a bailarina viguesa estará acompañada da violoncellista Macarena Montesinos.