Noticias

A Concellería de Educación pon en marcha os obradoiros das escolas infantís municipais de Conxo e Fontiñas. Están destinados a nenos e nenas de tres a seis anos e desenvolveranse de luns a venres, de 16:00 a 20:00 horas, agás nos períodos vacacionais dos centros, nos que horario pasará a ser de mañá.

A Concellería de Participación Cidadá colabora en Que ves cando me ves?, unhas xornadas pola visibilidade da muller na produción cultural galega actual e a reflexión crítica da cidadanía. Desenvólvense do 11 de maio ao 30 de xuño de 2011.

Xá están de volta en Santiago os 15 alumnos e alumnas de 2º de ESO do IES Rosalía de Castro que representaron á cidade na décima edición do programa Coñecer as Cidades Patrimonio. Primeiro en Ávila e logo en Toledo, cidade organizadora nesta convocatoria, os escolares viviron unha experiencia que cualificaron como única.

A concelleira de Benestar Social e Igualdade, Mar Martín, deu conta da licitación por 50.000 euros do Servizo de Atención Domiciliaria e Comunitaria á Infancia. O coñecido popularmente como servizo de canguros, incorporará a partir de agora outra función de intervención familiar, abordando aspectos socioeducativos.

A Concellería de Benestar Social e Igualdade destinará 70.000 euros á concesión de bolsas de comedor escolar no curso 2011-2012. A convocatoria estará aberta ata o 20 de maio e permitirá a aquelas familias con especiais necesidades acceder a bolsas de importe fixo de 80 euros ao mes.

O martes 10 comeza o VI Mercado Internacional de Curtametraxes dentro do programa do Festival Internacional de Curtametraxes Curtocircuíto, organizado pola Concellería de Cultura e Centros Socioculturais. Son 174 as credenciais tramitadas, das que a meirande parte corresponde a empresas produtoras de curtametraxes, distribuidoras, compradores, profesionais autónomos, prensa e un amplo número de estudantes. Unha videoteca no Centro Galego de Arte Contemporánea (CGAC) será a sé na que se desenvolva esta actividade.

Con 43 curtas o domingo día 8 e con 46 o luns día 9, continúa a programación da VIII edición do Festival Internacional de Curtametraxes Curtocircuíto, que organiza a Concellería de Cultura e Centros Socioculturais.

A Catedral de Santiago acolleu a celebración litúrxica de conmemoración do 800 Aniversario da basílica compostelá. A chamada Misa da Dedicación comezou co Itinerarium Crucis, unha procesión polas naves da Catedral coa que se recordaba o percorrido feito polo arcebispo Pedro Muñiz en 1211 para bendicir as doce cruces.

O concelleiro de Obras e Infraestruturas, Bernardino Rama, presentou os proxectos de tres obras no rural que sairán a licitación nos vindeiros días e que supoñen un investimento total de 609.424 euros. Trátase dunha senda peonil que unirá o polígono do Tambre e Son de Abaixo, da reurbanización do entorno do centro sociocultural de Marrocos e do vieiro entre Ponte Albar e Grixoa.

Inaugurouse a exposición Un mundo de posibilidades na Fundación Gonzalo Torrente Ballester (rúa do Vilar, 13). Trátase dunha mostra colectiva froito do proxecto de arte na Rede Municipal de Escolas Infantís, promovido pola Concellería de Educación en colaboración co artista plástico Xesús Carballido.