Noticias

O Festival d’Gorra entra nos seus últimos tres días e faino cunha nova xornada chea de acrobacias e humor. O público segue a responder á chamada dos artistas do circo e participa activamente nestes eventos que están a levar o espectáculo circense ás rúas do casco antigo compostelán.

A antepenúltima xornada de "Feitoamán" trae tres actuacións á Praza do Matadoiro, á Vía Sacra e á Praza de San Martiño Pinario. A partir das 22:30 horas, alí actuarán respectivamente Héctor Lorenzo e Pablo Seoane, Carmen Rey Quinteto e Xacobe Martínez Antelo Quinteto.

Unha nova atracción chega ao Festival d’Gorra. Trátase dos Espazos aéreos, unha invitación a gozar das acrobacias aéreas na Alameda. O espectáculo comezará ás 18:00 horas e prolongarase aos días 25 de 26 da man das compañías Almacabra, Teatro Deluxe e Duelirium.

O Calexón do Curro da Parra e a Praza dos Gatos acollerán, respectivamente, as actuacións do Carmen Rey Quinteto e de Blues Vivo Afrocuncas. Nova cita ás 22:30 horas en "Feitoamán".

Un novo xoves de proxeccións en CurtoCircuíto na Rúa. A Praza de Abastos será o escenario no que cinema e música se xunten unha vez máis a partir das 22:00 horas. Nesta ocasión farase unha retrospectiva dalgunhas das mellores curtametraxes galegas. A música corrrerá a cargo de Jordanairs.

Santiago acolle un verán máis o curso internacional Música en Compostela, un evento que se vén celebrando dende 1957. Os alumnos desta edición pasaron polo Concello, onde foron recibidos pola alcaldesa en funcións, Teresa García-Sabell.

O Festival d’Gorra vive o mércores 23 unha nova xornada de actuacións, onde varias compañías e artistas repiten pases dalgúns espectáculos. Non faltarán as acrobacias, a música, o humor e, sobre todo, a participación do público que se achegue ás prazas do casco antigo compostelán.

O Calexón do Curro da Parra e o pub Borriquita de Belém acollerán, respectivamente, as últimas actuacións de Fermín Romero e Fredy Fevereiro na presente edición de Feitoamán. A cita será, como sempre, ás 22:30 horas.

As seleccións de Braga, Pontevedra, Porto e Vigo disputarán os días 26 e 27 de Agosto a Fase Final da I Edición da Copa Gallaecia de fútbol sub-17. Esta proba deportiva está organizada pola Fundación Compostela Deporte, en colaboración coa Federación Galega de Fútbol e as asociacións de fútbol do Norte de Portugal.

Son xa 21 os Premios recollidos polo equipo da curtametraxe "Quérote mal", cuxo guión –de Mirela Giró- foi o gañador da pasada edición de CurtoCircuíto. O filme foi rodado en Santiago de Compostela, como este ano aconteceu con "Bechos Raros". Nesta ocasión, "Quérote mal" recibiu o galardón na V edición de "El Pecado 2006" que se celebrou no concello de Llerena, en Badajoz.