Noticias

A campaña de recollida de plástico, latas e briks xa ten gañadores. Un fin de semana para dúas persoas nunha casa de Turismo Rural é a recompensa da que poderán gozar 12 afortunados, que acreditaron o seu bo uso do contedor amarelo entre o 1 e o 30 de maio. O alcalde de Santiago, Xosé A. Sánchez Bugallo, entregoulle o premio aos agraciados nun acto celebrado no Salón Nobre do Concello con membros da Corporación.

Tras participar en eventos promocionais en Nova York e Toronto, Turismo de Santiago asiste en Helsinki á primeira edición da feira ‘City Break 2006’ e á conferencia anual e asemblea xeral do grupo European Cities Tourism, que reúne a un centenar de destinos europeos de turismo urbano.

O Departamento de Educación e Mocidade e a Universidade de Santiago poñen en marcha dous roteiros guiados polo Campus Sur da Universidade. Estes percorridos didácticos realizaranse o venres 16 de xuño ás 17:00 horas e están dirixidos ao profesorado de tódolos niveis educativos e a calquera cidadán. O punto de partida é diante da Facultade de Químicas, para o primeiro roteiro, e diante da entrada principal do Pavillón polideportivo do Monte da Condesa, para o segundo.

O Concello de Santiago achegará 51.000 euros para colaborar coas actividades que realizan na nosa cidade Cáritas Interparroquial, a Cruz Vermella e a Asociación Centro Cultural-Social Xoan XXIII. O alcalde de Santiago, Xosé A. Sánchez Bugallo, asinou esta mañá os convenios que así o establecen cos representantes destas tres entidades sociais.

A Concellaría de Emigración e Inmigración pon en marcha o Programa de integración dos/as nenos/as inmigrantes nas actividades socioculturais. Esta iniciativa, concibida para atender as demandas dos inmigrantes, está destinada a todos os nenos/as do municipio e contribuirá a unha plena integración nas actividades do Concello a través de obradoiros, xogos, piscina ou saídas para coñecer a cidade.

O ciclo Sons da Diversidade pecha a programación deste primeiro semestre cun concerto de Marful o venres 16 no Auditorio de Galicia. Pero antes de chegar ao seu fin, aínda trae un agasallo máis. Unha festa ao aire libre o mércores, 21 ás 21:00 horas, na Praza da Música en Compostela, (diante do Auditorio). A Concellaría de Cultura quere así sacar o ciclo á rúa para achegalo ao maior número de xente.