Noticias

O alcalde da cidade, Xosé A. Sánchez Bugallo, e a concelleira de Educación e Mocidade, Elvira Cienfuegos López, ademais doutros membros da corporación local, achegáronse o mércores 14 de xuño ás instalacións do centro CEE de Xordos para coñecer o traballo diario que desenvolve este centro educativo e compartir xantar cunha representación da comunidade escolar.

Ata o vindeiro venres 29 de xuño permanecerá aberto o prazo para solicitar unha das 70 vivendas de promoción pública de Belvís. Os pisos serán adxudicados en réxime de aluguer sen opción a compra por un prazo máximo de dez anos. Para poder optar a estas vivendas, os interesados deben ter entre 18 e 35 anos, residir ou traballar e Santiago dende alomenos dous anos, e ter uns ingresos por unidade familiar ou convivencial etre 479,10 euros e 1.676,85 euros brutos ao mes.

O alcalde de Santiago, Xosé A. Sánchez Bugallo, inaugurou a Xornada informativa sobre o Pacto Local, organizada pola Federación Galega de Municipios e Provincias (FEGAMP) no Hotel San Francisco. O evento, ao que asistiron máis de 150 alcaldes galegos, tiña coma obxectivo informar aos mesmos sobre o desenvolvemento do pacto e o funcionamento e obxectivos das súas distintas comisións.

Concienciar aos máis novos para que participen na recollida selectiva do lixo é o obxectivo da campaña "Si quero. Reciclar querendo", promovida pola Concellaría de Medio Ambiente en colaboración con Urbaser. A iniciativa desenvolverase dende o venres 16 en catro puntos da cidade e incluirá representacións teatrais na rúas, obradoiros e a difusión dunha serie de mensaxes dirixidas a nenos e nenas.

A Asociación Síndrome de Down de Compostela (Down Compostela) e a Asociación Compostelá de Esclerose Múltiple (ACEM) recibirán do Concello de Santiago unha achega respectiva de 1.500 euros para o desenvolvemento das súas actividades sociais. O alcalde compostelán, Xosé A. Sánchez Bugallo, asinou cos presidentes destas dúas asociacións, Juan Jesús Martínez e Carmen Vázquez Vaamonde, o convenio que establece a colaboración coas mesmas e o programa de actuacións ao que afecta.

As pianistas Katia e Marielle Labèque pechan a temporada da Real Filharmonía de Galicia, dirixida esta vez por Josep Pons. O "Concerto para dous pianos, percusión e orquestra", de Béla Bartók, xunto á "Sinfonía núm. 2 de Robert Schumann", conforman o programa do xoves 15 de xuño, ás 21.00 horas.

O Ensanche quedará conectado urbanística e esteticamente cos novos polígonos do sur grazas ás actuacións que se realizarán no solo SUP-1 de Romero Donallo. Unhas 200 vivendas, amplas dotacións de servizos, zonas verdes e deportivas, unha gran praza, un novo vieiro e un importante lavado de cara son algunhas das señas de identidade deste novo espazo.

O Centro Sociocultural do Castiñeiriño acolle esta semana un atractivo programa de actos, cos que celebra a súa II Semana Cultural. A concelleira de Centros Socioculturais, Mercedes Rosón, presentou o calendario de actividades, que inclúe exposicións, charlas, cine, xogos e actuacións musicais.

O Departamento de Educación e Mocidade colabora coa Fundación "la Caixa" e coa Consellería de Innovación e Industria na realización da exposición sobre "Culturas do Mundo. Coleccións do Museo de Dinamarca", que permanecerá en San Martiño Pinario entre o 14 de xuño e o 27 de agosto.

Varias instalacións deportivas da cidade acollerán ao longo de hoxe sábado as actividades do Día do Deporte en Compostela, co que se pechan os diferentes programas e campañas desenvolvidos ao longo do curso. Uns 2.000 mozos están chamados a participar nesta xornada, chea de eventos de balde en case tódalas disciplinas deportivas e que organiza a Concellaría de Deportes en colaboración con diversos clubes.