Noticias

Na Aula de Formación da Cámara de Comercio, o concelleiro de Promoción Económica, Xosé Manuel Iglesias, inaugurou a cuarta fase do proxecto Equal Compostela Social. Deste xeito, abriuse o Curso de xestión empresarial, co que comezaba as actividades formativas do programa. Están dirixidas a colectivos de difícil inserción laboral, como mulleres, mozos, inmigrantes, emigrantes retornados ou desempregados de longa duración que desexen crear a súa propia empresa.

Os ata agora concelleiros de Facenda e Transportes, Xaquín Fernández Leiceaga, e de Urbanismo, Luis Toxo Ramallo, formalizaron a renuncia ás súas actas de edís na sesión do Pleno municipal. Atrás queda unha longa traxectoria de ambos, que deixan as súas responsabilidades municipais para dedicarse aos seus labores como deputados autonómicos.

A Facultade de Ciencias da Comunicación acolle os días 25 e 26 de xaneiro o Foro Compostela sobre Muller en Investigación e Sociedade. As súas participantes foron recibidas en Raxoi.

Coincidindo co 30 de xaneiro, no que se conmemora o Día Mundial pola Paz, a Concellaría de Educación e Mocidade organiza o VIII Foro de encontro das Organizacións Non Gobernamentais. Celebrarase o sábado 27 de xaneiro no centro comercial Área Central, onde as ONGs darán a coñecer á cidadanía compostelá os seus materiais didácticos, proxectos e produtos de comercio xusto, entre outras iniciativas.

O Concello garantirá por escrito aos contribuíntes unha serie de compromisos de calidade en relación cos servizos que se lle prestan en materia de xestión, recadación e inspección. Isto será posible grazas a unha carta de servizos que estará operativo no ano 2008, segundo anunciou o concelleiro de Facenda, Xaquín Fernández Leiceaga.

O concelleiro de Transportes, Xaquín Fernández Leiceaga, presentou os datos de ocupación dos aparcadoiros públicos nos primeiros quince días de 2007. Destas cifras despréndese que medrou tanto o número de usuarios como da estanza media.

Un total de 51 persoas, 24 mulleres e 27 homes, accederon ao mercado laboral a través do Proxecto Crear III, que comezou a súa andadura o 1 de xuño de 2006 e remata o 31 de maio deste ano. No programa, desenvolvido pola Concellaría de Promoción Económica e no que colaboran o resto de municipios da comarca compostelá, participan 100 usuarios. 61 deles son mulleres e os outros 39 homes.

Ata un millón de persoas pasaron durante o 2006 polo Pavillón Mulitusos Fontes do Sar e máis polo de Santa Isabel. Ademais de acoller eventos relacionados co deporte, o recinto foi escenario de eventos musicais como a ópera Carmina Burana ou o festival de hip hop Microfest. Para facer balance do ano estiveron en Fontes do Sar o concelleiro de Deportes, Manuel Portas, e o xerente do Multiusos, Santiago Cuadrado.

Os premios "Educacompostela" chegan á súa quinta edición, na busca de recursos educativos en prol da innovación, da calidade educativa e da renovación pedagóxica. Haberá premios de 1.200, 900 e 600 euros para os tres mellores traballos.

O 25 de xaneiro, aqueles que se acheguen ao Auditorio de Galicia poderán gozar da mestría de Pieter Wispelwey, unha lenda viva no mundo do violoncello, na interpretación dun concerto de Saint-Saëns. A Real Filharmonía de Galicia, baixo a dirección de Juanjo Mena, acompañará a Wispelwey nun programa que se completará con obras de Beethoven e Haydn.