Noticias

A Xunta de Goberno Local, na súa sesión ordinaria, aprobou o proxecto definitivo de reurbanización da rúa Virxe Branca, no Castiñeiriño. Ademais, concedéronse subvencións a 14 entidades sociais e aprobáronse diversos convenios en materia cultural.

A concelleira de Benestar Social, Paula Prado, participou na campaña Mentalíza-T, co fin de conmemorar o Día Mundial da Saúde Mental. Nun acto celebrado no cruceiro de San Pedro, repartíronse máis de 500 adhesivos como símbolo de sensibilización e con recomendacións xerais sobre a saúde mental.

A concelleira de Comercio, Reyes Leis, presidiu o sorteo dos gañadores do concurso do Santiago Stock, que se celebrou no Pazo de Raxoi. Todas as persoas que realizaron algunha compra igual ou superior a 20 euros nalgún dos comercios participantes recibiron un boleto para participar no sorteo de dez cheques agasallo, por un valor de 50 euros, para gastar en calquera dos comercios participantes no evento.

A Unidade Municipal de Atención a Drogodependentes (UMAD) pon en marcha unha nova campaña destinada a concienciar aos mozos e mozas da necesidade de conciliación entre o seu lecer e o descanso dos veciños de Santiago. 1.500 carteis e 5.000 postais informarán á mocidade das sancións por condutas relacionadas co ruído ou co consumo de alcohol na rúa.

O concelleiro de Deportes, Adrián Varela, e o subdirector da Secretaría Xeral para o Deporte, Carlos Gómez, presentaron en Raxoi o Torneo Internacional de Squash PSA "Camiño de Santiago", que se celebrará do 15 ao 20 de outubro na pista de cristal instalada en Área Central. Previamente, do 12 ao 14 de outubro celebrarase o Campionato de España por equipos.

A Concellería de Economía abre o prazo de inscrición para o curso "Análise de mercados", acción formativa que se integra dentro do programa Santiago Investors Support. O curso desenvolverase en dous grupos, un os días 5 e 6 de novembro e outro os días 7 e 8 do mesmo mes. A inscrición pode facerse a través da páxina do CERSIA Empresa. O prazo remata o día 23 de outubro.

A concelleira de Medio Ambiente, María Castelao, reuniuse en Raxoi con técnicos e responsables da empresa Urbaser para falar sobre as actuacións que se están a realizar no vertedoiro clausurado de Aríns. Tras a xuntanza, indicou que avanzan segundo o previsto os traballos, que permitirán a construción dunha franxa perimetral de recollida de pluviais e dun valado, ademais da toma de mostras sobre os residuos alí depositados.

Unha representación do colectivo de vendedores ambulantes mantivo unha reunión coa concelleira de Comercio e Mercados, Reyes Leis, que os informou das novidades da nova ordenanza que regulará este tipo de comercio. A norma será previsiblemente sometida á aprobación do Pleno na sesión ordinaria de finais deste mes de outubro.

O alcalde compostelán, Ángel Currás, sumouse aos actos con motivo do Día Mundial da Optometría, visitando o stand disposto na Praza Roxa e realizando unha revisión da vista de preto.

A concelleira de Familia e Benestar Social, Paula Prado, xunto coa coordinadora de Xuntos Podemos, María Castro; e os vicepresidentes do Santiago Futsal, Ramón García e Lalo Froira, presentou a festa benéfica da familia que se realizará o venres 12 de outubro no Multiusos Fontes do Sar.