Noticias

O director-xerente do Auditorio de Galicia, José Víctor Carou presentou o programa do Compostela Rock para esta segunda parte do ano. Na primeira, de xaneiro a xullo, foron preto de 5.000 as persoas que asistiron aos 14 concertos celebrados, o cal consolida o ciclo como un dos máis seguidos polos composteláns.

Antes de que remate o mes de setembro, o Ministerio de Agricultura, Alimentación e Medio Ambiente adxudicará a redacción do anteproxecto da futura estación depuradora de augas residuais (EDAR) da Silvouta. Este é o compromiso que lle anunciou o conselleiro de Medio Ambiente, Territorio e Infraestruturas, Agustín Hernández, ao alcalde compostelán, Ángel Currás, tras asinar un convenio de colaboración para a coordinación e intercambio en materia de información xeográfica e territorial.

A concelleira de Comercio, Reyes Leis, e os presidentes das asociacións comerciais Compostela Monumental, José Manuel Bello, e Santiago Centro, José María Fernández, presentaron dúas accións formativas dirixidas aos comerciantes da cidade, que se organizan dentro do programa do departamento de Economía do Concello, Santiago Investors Support, e que contan coa colaboración de ambas asociacións comerciais.

O alcalde e presidente do Consorcio de Santiago, Ángel Currás, presentou a temporada de concertos do Auditorio de Galicia para o período 2012/2013, que comezará o 4 de outubro. Durante a mesma, o público será testemuña do paso da batuta de director titular de Antoni Ros Marbà a Paul Daniel, quen asumirá a dirección artística da Real Filharmonía de Galicia dende o 1 de xaneiro de 2012. En total serán 33 concertos, 26 dos cales protagonizaraos a propia Filharmonía.

A concelleira de Educación, Rebeca Domínguez, desprazouse ao CEIP Ramón Cabanillas para participar na apertura do curso escolar 2012-2013. As clases nos centros composteláns comezaron con normalidade e sen incidencias importantes.

O Hostal dos Reis Católicos acollerá o vindeiro venres, 14 de setembro, a partir das 19:00 horas, o acto de entrega das Medallas de Ouro da Cidade ao oftalmólogo Manuel Sánchez Salorio e, a título póstumo, ao que fora coengo e deán emérito da Catedral, Jesús Precedo Lafuente. O outorgamento destas distincións fora aprobado, a proposta da Alcaldía, no Pleno da Corporación do 26 de xullo.

O concelleiro de Medio Rural, Luis Bello, comunicou que xa se abriron as ofertas para adxudicar as obras do Plan de Obras e Servizos 2012 da Deputación da Coruña. Nesta ocasión, o Concello optou por dedicar o orzamento dispoñible integramente a obras de reforzo do firme no rural compostelán.

A Concellería de Participación Cidadá e Centros Socioculturais programou, no marco do seu programa de saídas e excursións, unha actividade de termalismo no balneario Arnoia Caldaria (Ourense). O prazo de inscrición aínda estará aberto ata o 15 de setembro.

A concelleira de Educación, Rebeca Domínguez, deu conta da ampliación do prazo de matrícula nos servizos de comedor e de madrugadores ata o sábado 15 de setembro. Ata o momento formalizáronse 215 matrículas.

O mércores 12 de setembro iníciase un novo curso na Escola Municipal de Música de Santiago de Compostela. Neste exercidio 2012-2013 a EMM incrementa notablemente a súa matrícula, superando xa os 300 alumnos, aínda que non ten finalizado o período de matrícula, que seguirá aberto ata finais de mes.