Noticias

Un total de 1.259 persoas acolleuse á posibilidade do pago fraccionado do Imposto sobre Bens Inmobles (IBI), segundo os datos ofrecidos pola Área de Facenda e Administración Pública. Este sistema fora creado a comezos de ano polo Goberno municipal para que os cidadáns que o solicitaran puideran pedir o fraccionamento do IBI 2013.

Mañá xoves, 4 de abril, ás 19:00 horas, a Galería Sargadelos acollerá un encontro co ilustrador Emilio Urberuaga, Premio Nacional de Ilustración e membro do xurado do VI Premio Internacional Compostela de Álbums Ilustrados.

A concelleira de Benestar Social, María Castelao, participou na reunión de barrio das Fontiñas coas entidades sociais, educativas e sanitarias que traballan na zona. O encontro celebrouse no Centro Sociocultural das Fontiñas.

Manuel Manquiña e Luis Zahera traen ao ciclo Falabaratos o seu espectáculo Monólogos inocentes. A función será no Teatro Principal o xoves 4 de abril, ás 21:00 horas. As entradas están á venda na billeteira do Teatro Principal (aberta de 18:00 a 21:00 horas de martes a sábado) e en entradas.novagaliciabanco.es a 8 euros (5 euros no anfiteatro).

O director-xerente do Auditorio de Galicia, José Víctor Carou presentou a programación do ciclo Infantil & Familiar para o mes de abril, composta polas obras A fábula galénica, Frankenstein, El Principito e un concerto da Real Filharmonía de Galicia con Thomas Piel. As funcións serán no Teatro Principal, excepto a clásica coa RFG, que será no Auditorio de Galicia. Todas as entradas están á venda na billeteira do Teatro Principal e nos medios habituais.

O alcalde compostelán, Ángel Currás, e a concelleira de Medio Ambiente, María Pardo, visitaron o Refuxio de Animais de Bando, tras a reunión que recentemente mantiveran en Raxoi cos seus voluntarios. Inspeccionaron as instalacións e analizaron os seus principais problemas, que na actualidade pasan sobre todo polo seu financiamento.

A concelleira de Xuventude, Rebeca Domínguez, inaugurou no Centro Sociocultural de Santa Marta o curso Xestión eficaz das redes sociais. O venres 5 de abril arrincará tamén, neste caso no Centro Sociocultural e Xuvenil Municipal do Ensanche, outra das accións formativas organizadas pola Concellería de Xuventude, o curso Fotografía en acción.

No mes de marzo, o número de persoas paradas en Santiago descendeu en 111 con respecto ao mes de febreiro, segundo os datos do Ministerio de Emprego. Esta cifra supón un descenso do 1,12% respecto ao mes anterior, unha baixada que supera tanto as cifras que houbo en Galicia, onde o descenso medio foi do 0,56%, coma no conxunto de España, onde a baixada foi do 0,1%.