Noticias

Dentro do programa de actividades de verán que organiza a Concellería de Participación Cidadá, o venres 26 de xuño, na Casa das Asociacións, terá lugar unha didáctica Noite de Astronomía. Aínda quedan prazas para apuntarse a esta sesión, que comeza ás 22:30 horas na terraza da Casa e na que colabora o Club Compostelán Astronomía Vega.

A concelleira de Educación, Mercedes Rosón, visitou os colexios de Fontiñas, Pío XII, López Ferreiro e Colexiata de Sar, onde se está a desenvolver dende o martes 23 a VIII Escola Municipal de Verán. Estes espazos educativos e lúdicos permanecerán abertos ata o 30 de xuño.

O concelleiro de Promoción Económica, Emprego, Comercio e Turismo, Xosé Manuel Iglesias, presentou o Proxecto Crear VI e realizou un balance do Crear V. O programa Crear é un proxecto experimental de orientación e inserción laboral que incide na dinamización dentro do mercado laboral da cidade.

A nova xerente de Incolsa, Maruxa Ledo, mantivo a súa primeira reunión co alcalde compostelán, Xosé A. Sánchez Bugallo, un día antes de incorporarase definitivamente ao seu posto.

O alcalde compostelán, Xosé A. Sánchez Bugallo, recibiu en Raxoi ao presidente da Asociación de Empresarios de Artes Gráficas de Galicia, Jacobo Bermejo. Este solicitoulle o seu apoio ao Congreso Nacional de Artes Gráficas que a entidade organizará no Ano Santo en Santiago.

Entre os días 23 e 26 de xuño, a Facultade de Medicina acolle o congreso anual da European University Information Systems (EUNIS). Este é o encontro de maior proxección no ámbito europeo relativo ás Tecnoloxías da Información e das Comunicacións (TIC). É a primeira vez que este evento se celebra en España.