Noticias

O Certame de Teatro Intercentros alcanza xa a súa XIV edición, con 14 representacións a cargo de trece centros escolares de Santiago e comarca os días 20, 21, 22, 23, 24, 27 e 28 de abril. Os salóns de actos dos institutos Rosalía de Castro e Xelmírez I acollerán un ano máis os espectáculos. A obra gañadora representarase no Teatro Principal.

O vindeiro luns 20 de abril, ás 19:00 horas, no Auditorio de Galicia, celebrarase a mesa redonda Redes sociais, Facebook, Tuenti...: A cara oculta dos amigos dos meus fillos. Este foro, organizado pola Concellaría de Benestar Social e Muller en colaboración co Colexio Profesional de Enxeñaría en Informática de Galicia, abordará o alcance destas redes e ofrecerá aos pais e educadores información sobre a repercusión das mesmas nas condutas dos seus fillos e alumnos. A entrada é libre.

A piscina do multiusos Fontes do Sar e do pavillón municipal do Restollal acollerán as actividades do Programa de Actividade Física, nos seus dous módulos: en seco e no medio acuático. Esta iniciativa está dirixida a organizacións de iniciativa social do ámbito socio-sanitario cuxos asociados, pola súa discapacidade, presenten necesidades especiais para a realización da práctica deportiva.

O Consorcio de Santiago decidiu, logo de cumprir os trámites legais correspondentes, rescindir o contrato de execución de obra da reurbanización da rúa de Sar á empresa adxudicataria no tramo entre a rúa do Olvido e avenida de Lugo por incumprimento de contrato.

A concelleira do Medio Ambiente e Desenvolvemento Sostíbel, Elvira Cienfuegos, presentou a segunda edición do programa Vive a Primavera, que ten como obxectivo a posta en valor dos espazos naturais de Compostela. Estas actividades deseñáronse inicialmente para atender ás necesidades do alumnado dos centros de ensino, máis son abertos a toda a cidadanía. Calquera grupo de persoas que o desexen pode solicitar unha visita guiada.