Noticias

A concelleira de Benestar Social, Mar Martín, presentou a memoria da Concellería de Benestar Social correspondente ao 2007. Neste período, o departamento atendeu 9.654 demandas a través dos seus Puntos de Atención de Servizos Sociais, situados no Centro de Servizos Sociais, en Galeras, e nos centros socioculturais de Vite, Conxo, Fontiñas, A Trisca e O Ensanche.

O xoves 26 de xuño, o alcalde, Xosé A. Sánchez Bugallo, dará inicio de maneira oficial ao programa do URBACT, no Centro de Estudos Avanzados da USC. Na xuntanza deste proxecto, que lidera Santiago, participarán expertos das cidades de Hamburgo, Nantes, Medway, Siemianowice Slaskie, Rennes e Albacete. Por parte da Secretaría europea do Programa URBACT asistirán Raffaele Barbato e a experta Heidrun Feigefeld.

Nun acto celebrado no Salón de Plenos de Raxoi, elixíronse mediante sorteo os doce nenos e nenas de 10 a 14 anos que participarán no programa "Vivir Zaragoza". Estas prazas son as que corresponden ao Concello dentro desta iniciativa, convocada pola Deputación da Coruña.

Desvelouse o gañador de Compostela Plató, o concurso de guión organizado polo Festival Internacional de Curtametraxes Curtocircuíto. Trátase de La princesa Alegría, do madrileño Daniel Utrilla.

A concelleira de Medio Ambiente e Desenvolvemento Sustentábel, Elvira Cienfuegos, acompañada de Paula Piñeiro, xerente de Aquagest en Santiago, presentou en rolda de prensa o roteiro De ponte a ponte, polo río Sarela, que será divulgado a través dun folleto despregable. O roteiro e o folleto son froito da colaboración entre a Concellaría do Medio Ambiente e a empresa Aquagest, empresa concesionaria da rede de abastecemento de augas do municipio.

O concelleiro de Festas, Xosé Baqueiro, anunciou un avance do programa das Festas do Apóstol, que se celebrarán entre o 18 e o 31 de xullo. Carlos Baute, Caetano Veloso, Mala Rodríguez, Milladoiro, Amaral ou Loreena Mckennitt son algúns dos nomes xa confirmados.

A exposición Fotógrafos Insospeitados. Celebridades detrás do obxectivo, inaugurarase martes 1 de xullo, ás 20:00 horas no Auditorio de Galicia. A Concellería de Cultura tiña previsto inaugurar esta mostra o 18 de xuño, pero problemas de transporte das pezas da mostra, provocados polo conflicto do transporte obrigaron a adiar a inauguración.

Os membros do Consello Económico e Social reuníronse para coñecer e dar aprobación ao documento final provisorio de liñas e medidas estratéxicas do Plan Estratéxico de Santiago de Compostela, que fai unha diagnose e achega as liñas mestras que seguirá a nosa cidade durante os vindeiros vinte anos.