Noticias

A concelleira de Educación, Guadalupe Rodríguez, presentou a convocatoria da XVI edición dos Premios Vagalume. Estes galardóns recoñecen o traballo de colectivos ou de persoas individuais que desenvolven as súas actividades cunha clara vocación social no municipio de Santiago.

O xoves 6 tivo lugar en Tarragona a Comisión Executiva do Grupo de Cidades Patrimonio da Humanidade, do que o alcalde, Xosé A. Sánchez Bugallo, é vicepresidente. Foi esta unha xuntanza preparatoria para a Asemblea do Grupo, que tivo lugar o venres 7 de novembro, na casa consistorial da cidade. Á mesma asistiron os alcaldes das cidades que integran o grupo, agás Cuenca, que desculpou a súa asistencia.

A Concellaría de Promoción Económica, Emprego, Comercio e Turismo colabora co II Foro de Emprego da Universidade de Santiago de Compostela, organizado polo Servizo de Apoio ao Emprendemento e ao Emprego (SAEE) da Vicerreitoría de Comunidade Universitaria e Compromiso Social en coordinación co Campus de Lugo. A Concellaría participará no encontro, os días 11 e 12 de novembro, cun stand informativo e cunha ponencia sobre intermediación laboral.

Un dos nomes que está a protagonizar o Festival Cineuropa 2008 é o do cineasta Olivier Assayas. A pesar do recoñecemento xeralizado que o director francés posúe na crítica internacional, son moi escasos os títulos que teñen chegado ás pantallas galegas. Cineuropa ofrece unha oportunidade única de se mergullar na suxestiva obra de Assayas, grazas á retrospectiva que lle está a dedicar nesta XXII edición.

A concelleira de Cidade Histórica e Rehabilitación, Olga Pedreira, participará no Wireless and Digital Cities. Este será o 3º congreso anual europeo, que se celebrará en Barcelona do 11 ao 13 de novembro baixo o epígrafe Connecting Communities. Aquí, profesionais e expertos de toda Europa darán a coñecer as súas experiencias no desenvolvemento de redes sen fíos.

Turismo de Santiago estará presente na World Trade Market, a feira turística máis importante do mercado británico, que se desenvolverá en Londres entre o 10 e o 13 de novembro. Na edición do 2007 participaron na feira 48.111 profesionais dos diferentes ámbitos do sector turístico procedentes de 197 países e rexións, uns datos que reflicten a importancia deste evento. A feira é un evento dirixido especificamente para profesionais e non está aberto ao público.