Noticias

A concelleira de Economía e Facenda, María Rozas, presentou esta mañá o borrador de orzamentos para o vindeiro exercicio, cuxa cifra ascende a 110 millóns de euros e supón o orzamento máis elevado dende o ano 2009.

A concelleira de Mercados, Noa Morales, e a xerente da Praza de Abastos, Marta Rey, presentaron Nadal do Mercado, a programación especial do recinto para estas datas. As actividades buscan incentivar o consumo de produto fresco entre a xente máis nova. Coa colaboración do Concello, este ano repartiranse 10.000 euros a través de varios sorteos.

A Cámara Municipal de Matosinhos (Portugal) acolleu unha reunión do Grupo de Educación do Eixo Atlántico, que preside o concelleiro de Educación e Cidadanía, Manuel Dios.

Esta tarde arrancou, na Facultade de Ciencias da Información, o encontro cultRural, co que Santiago quere converterse nos próximos días na capital da cultura rural. Na inauguración participou o concelleiro de Medio Ambiente e Convivencia, Xan Duro, que incidiu en que, "como dicía Otero Pedrayo, Santiago é a aldea máis grande de Europa, na que calquera persoa do rural se sente ben acollida".

A Xunta de Goberno aprobou este luns dous proxectos que permitirán renovar os viarios de acceso tanto ao estadio de fútbol de San Lázaro como ao Palacio de Congresos, e que suporán un investimento de preto de 900.000 euros.

A concelleira de Acción Cultural, Branca Novoneyra, presentou a Cabalgata de Reis desta edición do Nadal. Case 400 persoas -a metade delas voluntarias- participarán no evento, que desta vez terá como temática a maxia das lendas. A Cabalgata volverá a ser aberta e inclusiva, coa posibilidade de participar como paxes ou como integrantes dos trens e carrozas, dende as que se repartirán 2.000 quilos de caramelos sen gluten.

Desde este luns 11 e ata o vindeiro domingo 17 de decembro, a Policía Local de Santiago súmase á campaña especial de control das taxas de alcohol e de drogas na condución. Esta campaña da Dirección Xeral de Tráfico súmase aos controis que periodicamente realiza a Policía Local.

Este martes 12 de decembro, ás 19:30 horas, o Teatro Principal acolle o Festival de Nadal 2017 da Escola Municipal de Música. Máis de 180 músicos e músicas das diferentes agrupacións da EMM subiranse ao escenario para dar a coñecer o traballo realizado durante os últimos meses. Para a asistencia é necesaria a retirada da correspondente entrada previa petición na Escola Municipal de Música, ata completar o aforo do recinto.

O alcalde de Santiago, Martiño Noriega, reuniuse coa Asociación Veciñal Río Sarela, co barrio de San Lourenzo.

O xoves, 14 de decembro, a partir das 20:30 horas, a compañía de danza Mal Pelo representará no Teatro Principal o espectáculo O quinto inverno, un poema coreográfico límpido, á vez tenro e potente, construído a partir das palabras do escritor e poeta italiano Erri de Luca.