Noticias

O alcalde e a concelleira de Políticas Sociais visitaron hoxe o centro de día que Aspanaes xestiona en Villestro, e que ten como obxectivo promover a inclusión social das persoas con TEA. Martiño Noriega e Concha Fernández estiveron acompañados polo persoal do centro e máis pola presidenta de Aspanaes na provincia da Coruña, María José Álvarez Folgar.

Turismo de Santiago participa esta semana nunha acción de promoción organizada pola Oficina Española de Turismo en Milán, que permitirá presentar a cidade a máis de 250 axencias de viaxes italianas. A acción desenvolverase nas cidades de Roma, Florencia, Verona e Turín.

A Real Filharmonía de Galicia tocará esta semana unha selección da ópera Electra en versión concerto. Será este xoves 12, ás 20:30 horas, no Auditorio de Galicia, dentro da súa tempada de abono. A batuta levaraa o director titular e artístico da agrupación, o mestre Paul Daniel.

O alcalde solicitará unha reunión coa secretaria de Estado de Medio Ambiente e presidenta de Acuaes, María García Rodríguez, para seguir analizando a proposta do Concello para a construción da nova EDAR na Silvouta. Martiño Noriega quere "esgotar todas as vías, despois da decepción da reunión celebrada hoxe coa directora xeral de Acuaes, que mantén exactamente a mesma proposta para a depuradora do Souto que foi rexeitada polo Pleno da Corporación".

O Salón Nobre acolleu está mañá a recepción ás participantes no II Encontro de Mulleres na Lusofonia: Mulheres, Territórios e Memórias. No acto participaron as concelleiras de Políticas Sociais e de Acción Cultural, Concha Fernández e Branca Novoneyra, así como as concelleiras María Antón, Mila Castro e Goretti Sanmartín.

A Xunta de Goberno deu conta hoxe da resolución do Tribunal Administrativo Central de Recursos Contractuais que desestima integramente o recurso interposto por Arasti Barca contra a adxudicación do servizo de dinamización e mediación sociocultural da rede de Centros Cívicos. Deste xeito, o Concello segue adiante co procedemento de contratación, e require a Ferrovial para a formalización do contrato.

O Centro Sociocultural de Santa Marta únese á celebración do Día Internacional da Nai Terra (22 de abril), con diversas accións durante este mes para toda a veciñanza. O obxectivo é fomentar a harmonía coa natureza para alcanzar o equilibrio xusto entre as necesidades económicas, sociais e medioambientais das xeracións presentes e futuras.

A concelleira de Economía e Facenda, María Rozas, deu conta este venres da finalización do proceso de regularización catastral, que puxo en marcha a Dirección Xeral do Catastro (dependente no Ministerio de Facenda e Administracións Públicas) no período 2013-2017. No caso do Concello de Santiago, esa regularización produciuse durante o ano pasado, afectando finalmente a case 10.000 veciños e veciñas de Compostela.

A Xunta de Goberno aprobou hoxe o proxecto de reparación e consolidación da Ponte de Vidán, orzamentado en case medio millón de euros, e cun prazo de execución de 5 meses. A infraestrutura sufrira importantes danos durante as obras de construción do colector xeral do río Sar.

O alcalde de Santiago, Martiño Noriega, recibiu este venres a Jesús Asorey, presidente da Cámara de Comercio de Santiago, que deixa o seu cargo este mes de abril despois de 20 anos á fronte do organismo. No encontro tamén participou o secretario xeral en funcións da Cámara, Fernando Barros.