CULTURA
Liberal Arts vai ser, seguramente, a comedia desta edición de Cineuropa. Procedente de Sundance, dirixida e interpretada por Josh Radnor, que presentou en Cineuropa hai un par de anos Happytahnkyoumoreplease, céntrase na mutua atracción entre un profesor de letras de trintaetantos e unha das súas estudantes. E atención á chiscadela, o "gurú cultural" da historia é nada menos que Zach Efron, neosex-symbol da industria hollywoodiense.
"Foxfire", revolta contra o machismo, e a comedia chegada de Sundance "Liberal arts", entre as propostas da xornada en Cineuropa
12/11/2012 Foxfire, que chega a noite do martes 13 ao Principal, é un dos pratos fortes deste XXVI Cineuropa. A firma de Laurent Cantet, cineasta de contrastado compromiso social, gañador en Cannes con A clase, e o premio que obtivo unha das súas actrices en San Sebastián sitúana no foco das atencións deste martes.
Foxfire adapta unha novela da eterna candidata ao Nobel Joyce Carol Oates, na que se narra unha revolta armada real e insólita: o levantamento insurreccional dun grupo de adolescentes que, farto de sufrir os malos tratos machistas na América Profunda da superficialmente apacible sociedade norteamericana dos 50, organizou un grupo de acción directa decidido a vingar as súas contas pendentes cos homes. O grupo de protagonistas de Foxfire lanzouse á carreira das armas, nunha partida a metade de camiño entre o grupo gangsteril e o terrorismo de acción directa. E Cantet, na súa primeira aventura nos Estados Unidos, filma e acerta a recoller a densa atmosfera dese arrebato de violencia no país até entón moldeado por Mullerciñas, un terrorismo de xénero singular, a metade de camiño entre a aventura iniciática dunhas mozas que non terminan de ser conscientes da fuxida cara adiante na que se embarcan e a crónica negrísima do abrupto salto do soño ao pesadelo norteamericano. A Cuncha de Prata en San Sebastián foi a unha das súas actrices, a que fai as veces de narradora en off desta tolemia fascinante, pero moi ben puidese ser recoñecemento coral ao grupo de excelentes actrices da magnética aventura norteamericana de Cantet.Liberal Arts vai ser, seguramente, a comedia desta edición de Cineuropa. Procedente de Sundance, dirixida e interpretada por Josh Radnor, que presentou en Cineuropa hai un par de anos Happytahnkyoumoreplease, céntrase na mutua atracción entre un profesor de letras de trintaetantos e unha das súas estudantes. E atención á chiscadela, o "gurú cultural" da historia é nada menos que Zach Efron, neosex-symbol da industria hollywoodiense.