O túnel do Mestre Mateo comezará a funcionar o xoves 13 de outubro
11/10/2005 A Consellería de Política Territorial, Obras Públicas e Transportes e o Concello de Santiago de Compostela informan que, unha vez rematados os últimos labores para a súa plena operatividade, o túnel de Mestre Mateo comezará a funcionar o xoves, 13 de outubro a partir das 13.00 horas aproximadamente.
Actualmente a obra da travesía, que permitirá incrementar a fluidez do tráfico entre Romero Donallo e Mestre Mateo e que conforma un dos principais accesos da cidade, está practicamente concluída. Tan só quedan por ultimar algunhas pequenas operacións fundamentais para a seguridade dos usuarios, como a completa sinalización viaria horizontal e vertical e a instalación de elementos reflectantes no interior do túnel. Tanto a Consellería como o Concello, que levan investidos máis de cinco millóns de euros nesta actuación, asumiron o compromiso conxunto de axilizar ao máximo as obras para a posta a punto desta vital arteria de circulación.
Segundo as previsións as derradeiras operacións estarán antes da fin de semana, de xeito que o xoves 13 de outubro entrará en servizo este novo vial que foi executado cumprindo os prazos inicialmente previstos, a pesares das dificultades atopadas nos terreos onde se realizaron as necesarias escavacións.
Así pois, a remodelación da Avenida Mestre Mateo e Victoria Míguez entre Romero Donallo e o nó de Vidán, e a construción dun paso inferior na avenida Mestre Mateo supón unha completa e complexa transformación desta arteria da cidade, incorporando plenamente ao ámbito urbano o barrio de Vidán e as novas urbanizacións da Choupana, Santa Marta, e facilitando o tránsito cara ao Hospital Clínico.
A mellora da calidade urbana desta parte da cidade e da seguridade vial son moi significativas, así como a desconxestión e a ampla avenida urbana que quedará nos accesos á cidade desde a estradas de Noia e Pontevedra. Estes accesos rexistran unha alta densidade de tráfico, especialmente nas franxas horarias punta dos miles de cidadáns que se desprazan aos seus postos de traballo na capital de Galicia.