O Xulgado estima o recurso do Ilustre Colexio de Enxeñeiros Industriais de Galicia sobre a gasolineira de Brandía
11/11/2022 O Xulgado do Contencioso-Administrativo número 1 de Santiago de Compostela acaba de ditar unha sentenza pola que, a instancia do Ilustre Colexio de Enxeñeiros Industriais de Galicia, anula a licencia de obras que o Concello de Santiago concedeu a Carburantes Lugo S.L. para a construción dun edificio comercial e unha unidade de subministro de carburantes no Paseo de Esvedro- Paseo de Amaia, en Brandía.
O Concello estudará a sentencia pero, en principio, descarta o recurso.
Trátase dun litixio meramente formal e accesorio, no que non estaba representada a veciñanza da urbanización, contrarios a que a gasolineira se situara alí. A sentenza anula o acordo da XGL con data do 29 de novembro de 2021 no que se lle concedeu a licencia de obra a Carburantes Lugo SL, para a construción dunha gasolineira segundo o proxecto básico e de execución redactado por unha arquitecta e con visado do COAG.
O Concello admitira o proxecto porque contaba con ese visado mais, agora, sendo a sentencia apelable e discutible, o maxistrado dálle a razón ao ICOIIG, censurando que o proxecto complementario estivera elaborado por un enxeñeiro técnico, en lugar dun enxeñeiro industrial superior que é "o único técnico competente para elaborar un proxecto de construción e posta en funcionamento dunha estación de subministro de combustible".
Así as cousas, o proxecto complementario co que contaba a gasolineira de Brandía "non confire validez á licencia de obras", polo que o xuíz declara a nulidade da mesma. Así, unha vez firme a anulación, esta implicará o cese das obras e/ou actividade e obrigará a proceder coa demolición do xa edificado, construído e instalado en base a dita licencia ilegal.
O Concello estudará a sentencia
Desde o Concello, en consonancia coa vontade amosada en todo momento polo equipo de goberno, e atendendo ás indicacións dos servicios xurídicos municipais, a intención inicial é non recorrer a sentencia que obriga á administración local a asumir a demolición do edificio e as costas do litixio.
O concello acordara conceder a licencia en XGL en 2021, porque contaba con tódolos informes técnicos favorables á súa concesión e porque se entendía que respectaba o recollido na Lei de Hidrocarburos que establece que tódolos solos clasificados para uso comercial ou industrial, como é o caso, teñen como actividade compatible a económica de subministro de combustible. Mais, xa nese momento, o alcalde explicara que a decisión tomárase "por obriga legal".
Agora, atendendo esta nova sentencia, nun debate ata ese momento non plantexado, a folla de ruta será estudar as alternativas de actuación mais, tendo en conta, que se trata dun proxecto ao que se opón a veciñanza e que nunca contou tampouco co favor do equipo de goberno, a posición de partida é descartar ese recurso.