CENTROS SOCIOCULTURAIS

A rede de Centros Socioculturais organiza entre o 21 de maio e o 28 de xullo distintas actividades relacionadas coa apicultura

06/05/2021 A rede de Centros Socioculturais vai desenvolver, con motivo do "Día mundial das abellas" que se celebra o 20 de maio, unha serie de actividades relacionadas coa apicultura. Entre o 21 de maio e o 28 de xullo, os CSC de Castiñeiriño, Fontiñas, Marrozos, Laraño, O Romaño, Vite e Santa Marta, organizan distintas conferencias, obradoiros e catas de mel. O obxectivo é familiarizar as persoas usuarias e a cativada co mundo da apicultura desde distintas perspectivas.

O programa comeza o 21 de maio, ás seis da tarde, no CSC do Castiñeiriño, coa conferencia "Coñezamos a vespa Asiática (Vespa velutina), é perigosa para a saúde?", impartida por Xesús Feás, científico e experto no tema.

Un día despois, o 22 de maio, ás once da mañá, terá lugar no CSC de Fontiñas, o primeiro dos "Obradoiros de trampeo para os máis pequenos" conducido pola Asociación de Apicultores de Santiago, e dirixido a menores de entre 6 e 14 anos. Require unha inscrición previa no mesmo centro de Fontiñas, e está promovido por as Aulas de Xogo. Repetirase o martes, 22 de xuño, ás seis da tarde no Centro Sociocultural de Marrozos, previa inscrición no teléfono da Casa das Asociacións.

No marco do programa "Vive o verán" celebraranse outros dous obradoiros coa mesma temática: o 9 de xullo, ás dez da mañá, no CSC de Vite; e o 19 de xullo, ás doce do mediodía, no de Santa Marta.

A maiores están programados outros dous obradoiros de trampeo dirixidos a todos os públicos, que se desenvolverán o 20 de xullo ás cinco da tarde no Romaño, e o 28 de xullo ás once da mañá no Castiñeiriño. A inscrición debe realizarse, nos dous casos, no mesmo centro no que se imparte.

Tamén se desenvolverán catas de mel, a cargo do Centro regulador de denominación protexida "Mel de Galicia". As datas: 24 de xuño, ás seis e media da tarde, no CSC de Laraño, previa inscrición na Casa das Asociacións de Cornes; e 29 de xuño ás cinco da tarde, no CSC do Romaño. Xa no mes de xullo, concretamente o día 7 ás once da mañá, está programada outra cata no CSC de Pontepedriña.

Compartir: