EDUCACIÓN E CIDADANÍA

A Escola Municipal de Música ofreceu un concerto para a veciñanza de Compostela na finca de Vista Alegre

11/10/2017 A Finca de Vista Alegre acolleu este mércores un concerto para a veciñanza organizado pola Escola Municipal de Música. Foi unha boa oportunidade para que a cidadanía compostelá se achegara a coñecer o resultado do traballo das diferentes agrupacións da Escola na súa nova ubicación.

Neste concerto participaron máis de 100 alumnos e alumnas, acompañados do profesorado da EMM e das súas familias. A actuación tivo lugar no parque de Vista Alegre, diante da sede da EMM.

Interviñeron a Orquestra de Corda xunto coa Orquestra de Iniciación, o Grupo de Percusión da EMM, a Agrupación de Música Tradicional xunto co Coro de adultos da EMM, e a Banda de Música da Escola Municipal. No concerto escoitáronse dende obras da música galega ou de bandas sonoras a obras orixinais para banda sinfónica, pasando mesmo por algún tema pop.

A Escola Municipal de Música de Santiago de Compostela conta cunha matrícula de 430 alumnos e alumnas a partir dos 3 anos; e 21 profesores e profesoras que imparten 21 especialidades instrumentais, entre as que podemos salientar: 43 alumnos/as de violín, 36 de piano, 21 de clarinete, 20 de percusión, 15 de saxofón ou 21 de chelo, por citar algúns dos instrumentos de maior demanda.

Ademais, o centro conta con agrupacións musicais onde se integra o alumnado: Orquestra de Corda, Orquestra de iniciación para os máis pequenos, Banda e Banda de iniciación, Agrupación Tradicional, Agrupación de Música Moderna, Coro Infantil e Coro Xuvenil e de Adultos.

Compartir: