Agenda

A Zona C acolle unha exposición de Nuria Ruibal baixo o título Entre a razón e a pel.

Do 17 de xuño ao 12 de setembro, na Zona C.

A Casa das Asociacións acolle a exposición "A indumentaria tradicional galega. O traxe de Muros". A mostra é obra da Agrupación Folclórica Ximiela, coa colaboración da Deputación da Coruña. Consta de nove traxes rexionais, sete de muller e dous de home, en manequíns, representando a indumentaria tradicional das distintas comarcas galegas. Ademais, exhíbese unha colección de roupas, traxes infantís, adornos, xoiería e unha ampla colección de bonecas.

Todos os traxes foron confeccionados pola Agrupación Folclórica Ximiela, de Louro (Muros). Esta asociación naceu hai dez anos coa intención de ocupar o ocio infantil na parroquia con clases de baile, instrumentación e canto, formando un grupo folclórico. O traxes iniciais dos grupos de baile e gaita eran correntes, e entón propuxéronse confeccionar elos mesmos unha indumentaria luxosa, partindo do afamado que era tradicionalmente o traxe de Muros. Agora exhiben unha pequena mostra, pois teñen preto de cen traxes para todos os seus bailaríns e músicos.

Esta exposición comezou a súa andaina en Muros, o verán de 2009. Dende entón percorreu as salas de exposicións dos concellos de Outes, Mazaricos, Negreira, Ames, Carnota, Cee, Ribeira, Santa Comba, Boiro, Cerceda e Oroso. Tamén representou á Deputación nun programa de intercambio cultural coa cidade portuguesa de Viana, permanecendo exposta un mes no Museo Nacional do Traxe de Portugal. En setembro levarase ao Parlamento Europeo. A Concellería agasallará ás asociacións con exemplares do catálogo desta exposición.

Do 22 de xuño ao 30 de xullo, na Casa das Asociacións.

Títeres Cachirulo imparte o obradoiro de monicreques Titiriarte, no marco do programa Santiago Encantado.

O martes 22 de xuño, ás 18:00 horas, no Local Sociocultural de Amio.

Continúan as actividades para conmemorar o Día Europeo da Música. Desta volta, haberá dous concertos no Casino e outro na Praza Salvador Parga.

Dentro do ciclo Veladas no Casino, ás 18:00horas, a Escola Municipal de Música ofrecerá un Conto musicado, mentres que, ás 20:00 horas, a Escola de Música Berenguela interpretará Música de cámara e obradoiro literario. Xa ás 23:00 horas, actuación ao piano de Javier Varela.

Ademais, ás 18:00 horas, estudantes do Conservatorio Histórico actuarán na Praza Salvador Parga.

Ás 18:00, 20:00 e 23:00 horas, no Casino.

Ás 18:00 horas, na praza Salvador Parga.

• Programa de actividades

A concelleira de Participación Cidadá organiza a II Festa do Solsticio de Verán, que terá lugar a noite do martes 22 de xuño na Casa das Asociacións (rúa Manuel Beiras, 3).

Ademais de fogueira e sardiñas, haberá actuacións musicais, das Pandeireteiras de Marantes e do grupo Van de Varanda. Outra das actividades será un espectáculo de maxia a cargo do Mago Xacobe e Teatro de Cámara Dítea porá a sorpresa escénica da noite con bruxas e conxuros.

A entrada é de balde. Unicamente se ofrecerá coas sardiñas e coa bebida un xerro conmemorativo de cerámica de Buño, a un prezo de dous euros.

O martes 22 de xuño, ás 21:30 horas, na Casa das Asociacións.

• Cartaz da Festa