Agenda

O Auditorio de Galicia acolle unha mostra retrospectiva da obra de Manuel Outumuro, reputado fotógrafo ourensán de moda afincado en Barcelona, que percorre dúas décadas de traballos.

Ata o 12 de decembro na Sala Isaac Díaz Pardo do Auditorio de Galicia.

Nove artistas internacionais transforman Santiago de Compostela durante dous meses no marco do proxecto expositivo A Cidade Interpretada. Estes creadores realizarán diversas intervencións artísticas de carácter temporal en diferentes lugares da cidade dentro desta iniciativa, comisariada por Pablo Fanego.

A Cidade Interpretada contará coas intervencións do artista romanés Mircea Cantor; a parella holandesa Lonnie van Brummelen & Siebren de Haan; a francesa Latifa Echakhch; o austríaco Andreas Fogarasi; o romanés Daniel Knorr; o galego Rubén Santiago; o alemán Florian Slotawa e o neozelandés Michael Stevenson.

Ata o 28 de novembro, en diversos espazos da cidade.

• Máis información

A Concellería de Participación Cidadá leva á Casa das Asociacións (antiga estación de Cornes, rúa Manuel Beiras, 3) unha exposición da Asociación de Mulleres Progresistas "Alba". A mostra exhibe os traballos realizados polas participantes no Curso de Pintura ao Óleo promovido pola devandita asociación.

Do 19 ao 30 de outubro, na Casa das Asociacións.

Horario de mañá de luns a sábado, de 10:00 a 14:00 horas, e de tarde de martes a sábado, de 17:00 a 21:00 horas.

O programa Aula de Xogo trae ás Fontiñas a Semana dos espantallos. Está dirixida a nenos e nenas maiores de cinco anos ou menores acompañados dun adulto.

Do 19 ao 22 de outubro, ás 18:30 horas, no Centro Sociocultural das Fontiñas.

O CSC de Conxo acolle unha conferencia sobre fungos comestibles a cargo de José María Costa Lago, da Asociación de Micoloxía "Pan do raposo".

O venres 22, ás 20:30 horas, no Centro Sociocultural de Conxo.

Segunda orquestra invitada do mes de outubro na programación do Auditorio. Nesta ocasión a protagonista será a Orquestra Sinfónica do Porto Casa da Música, baixo a dirección de Michail Jurowski. Interpretará obras de Prokofiev e Chaikovski.

O venres 22 de outubro, ás 21:00 horas, no Auditorio de Galicia.