{*titulo}

O Concello de Santiago sumarase este sábado, 30 de marzo á celebración da Hora do Planeta, unha campaña de WWF concibida como un xesto simbólico de sensibilización global contra o cambio climático. Así, entre as 20:30 e as 21:30 horas, quedarán a escuras as prazas do Obradoiro, Cervantes e Praterías.

Ata o venres 5 de abril permanecerá abrto o prazo de inscrición no Programa Municipal de Conciliación de Semana Santa 2019, organizado polo Departamento de Educación e Cidadanía. Este programa concíbese como un espazo educativo e de promoción do lecer, ademais de ser unha alternativa de conciliación para as familias no tempo de vacacións de Semana Santa.

A Xunta de Goberno acordou hoxe exercer a acusación particular nas dilixencias previas iniciadas como consecuencia da denuncia e a querela impulsadas pola Fiscalía en relación ao vertedoiro de Miramontes. O alcalde, Martiño Noriega, lembrou que "o Goberno local ten un interese directo e evidente en que as actividades de xestión de residuos que se desenvolven en Compostela se axusten á legalidade, e máis cando inciden no medio ambiente e nas condicións de vida da veciñanza".

A Xunta de Goberno aprobou hoxe o Plan de Xestión da Cidade Histórica, un documento requirido pola UNESCO para as Cidades Patrimonio da Humanidade e que, na práctica, equivale á elaboración dun Plan Estratéxico. O concelleiro de Espazos Cidadáns, Dereito á Vivenda e Mobilidade, Jorge Duarte, lembrou que o documento "é o froito dun proceso de participación no que participaron máis dun cento de axentes da cidade e de moi distintos ámbitos".

Xa está en marcha unha nova edición do proxecto Enreguéifate, impulsado polos concellos de Santiago, Ames e Teo para promocionar o uso do galego a través da improvisación oral en verso. O próximo luns abre o prazo de inscrición para presentar os vídeos ao certame de regueifas, e comezan tamén os obradoiros de improvisación nos centros educativos de Compostela.

O Boletín Oficial da Provincia publicaba esta mañá o anuncio polo cal o Concello vén de convocar catro prazas de coordinador/a de Centros Cívicos, co obxectivo de fortalecer a rede de centros, dotándoa dunha mellor estrutura funcional que permita mellorar a coordinación e o control deste servizo público.

A Xunta de Goberno adxudicou hoxe o contrato das obras de mellora do firme nas parroquias de Verdía, Grixoa, A Peregrina, Sabugueira e Barciela, ás que se van destinar case 175.000 euros. Dos traballos encargarase a empresa Alcomte Galicia.

As Fillas Bravas, personaxes creados pola compañía Chévere, serán as protagonistas do evento climático organizado este ano no marco do proxecto Descarboniza! Que non é pouco.... O espectáculo Bravas fronte ao cambio climático, que contará tamén coa participación do contacontos Celso F. Sanmartín, celebrarase no Teatro Principal o próximo 10 de abril. Os convites para asistir poderanse retirar a partir do día 2.

O Concello de Santiago e a Asociación Cultural O Galo queren dar a coñecer e poñer en valor a pegada que o escultor Francisco Asorey deixou en Compostela. É por iso que ambas institucións colaboran no roteiro guiado que se vai desenvolver o próximo 5 de abril. A iniciativa foi presentada hoxe pola concelleira de Acción Cultural, Branca Novoneyra; a secretaria da Asociación O Galo, Mercedes Espiño, e a tesoureira, Esperanza Delgado.

A concelleira de Políticas Sociais, Concha Fernández, deu conta hoxe dunha nova edición do proxecto de radio comunitaria que se vai desenvolver no barrio de Conxo. Na rolda estivo acompañada de Ramón Molina, educador social e promotor da acción.