{*titulo}

O alcalde compostelán manterá unha xuntanza co ministro de Fomento, José Blanco, para falar sobre o AVE. Será á volta da viaxe que Xosé A. Sánchez Bugallo realizará a Bos Aires e Montevideo entre o 1 e 8 de maio. Nesta xuntanza, insistiralle na necesidade do falso túnel para a entrada do AVE en Santiago a través de Pontepedriña.

O concelleiro de Xuventude, Xosé Baqueiro, presentou dous ciclos de cinema. O primeiro, "Os meus terrores favoritos", celebrarase do 4 ao 8 de maio, e o outro, "No Future", no mes de outubro, ambos no Centro Sociocultural e Xuvenil Municipal do Ensanche dende as 20:15 horas.

O Pleno municipal aprobou inicialmente por unanimidade a nova ordenanza reguladora do Programa de Axuda no Fogar. Esta norma regula unha serie de atencións ou coidados de carácter persoal, doméstico, psicosocial, educativo, técnico e comunitario prestadas dentro ou fóra do domicilio a aqueles cidadáns con situacións de limitada autonomía persoal ou en casos de desestruturación familiar.

A responsable de Réxime Interior, Rosa Fernández Somoza, levou ao Pleno a aprobación inicial do Regulamento de Organización e Funcionamento da Comisión de Investigación e Resolución de casos de Acoso Psicolóxico no Traballo.

A segunda edición do Certame MúsicaXove, organizado pola Concellaría de Xuventude, celebra o xoves 30, ás 22:00 horas, na Sala Capitol, a súas últimas finais por categorías. Será unha dobre sesión de boa música con grupos de autor-folk (Perpetradores de Actor, Liridade Noctámbula e Roberto Sobrado) e de pop-rock (Frab Fly, Agoraphobia e Dirty Socks).

O Campus Sur vai a mudar de cara nos vindeiros anos, grazas a un amplo proxecto de reurbanización que dotará a esta área de amplos espazos peonís e dun carril bici ao longo da mesma. A primeira fase desta reforma comezará á volta do verán probablemente na avenida de Antonio Raimundo Ibáñez, no contorno do estanque.

O alcalde compostelán, Xosé A. Sánchez Bugallo, presidiu en Raxoi a constitución da Comisión Informativa de Comunicación do Grupo de Cidades Patrimonio da Humanidade de España. Nesa xuntanza participaron os responsables de comunicación das trece cidades do Grupo.

O alcalde compostelán, Xosé A. Sánchez Bugallo, reuniuse coa presidenta e a tesoureira do Colexio de Educadoras e Educadores Sociais de Galicia (CEESG), María José Fernández Barreiro e María Jesús Gutiérrez, respectivamente.

Corenta persoas xa cubriron a enquisa de necesidades formativas á que se pode acceder a través da páxina web da Concellaría de Promoción Económica, Emprego, Comercio e Turismo: www.maiscompostela.org. Este cuestionario está situado na páxina principal, debaixo do cadro Compostela traballa.

A concelleira de Educación, Guadalupe Rodríguez, acompañada polo catedrático e xefe da Unidade de Pediatría do CHUS, Rafael Tojo, e da profesora e doutora Rosaura Leis, visitaron o colexio Raíña Fabiola, onde estiveron tamén co seu director.