{*titulo}

Ata o 13 de agosto estará aberta a edición número 44 do Curso Internacional Música en Compostela. O alcalde compostelán, Xerardo Conde Roa, participou no acto inaugural do curso, celebrado no Hostal dos Reis Católicos.

O Concello rendeulle homenaxe a Aquilino Iglesia Alvariño ao cumprirse o 50 cabodano da súa morte. Fíxoo participando do acto que organizou o PEN Club Galicia para reivindicar a figura e obra do escritor. Foi no camposanto de Bonaval e alí estiveron o alcalde da cidade, Xerardo Conde Roa, e o concelleiro de Cultura, Ángel Currás, para participar na ofrenda floral.

Rematou na Alameda unha nova edición do Campionato de Chave, competición xa tradicional nas Festas do Apóstolo. O alcalde compostelán, Xerardo Conde Roa, asistiu ás finais e á posterior entrega de premios.

O concelleiro de Medio Rural, Luís García Bello, reuniuse co presidente de Augas de Galicia, Francisco Menéndez. Ambos falaron, entre outros asuntos, das obras executadas en base ao convenio de colaboración entre o Concello, a Consellería de Medio Ambiente e a Empresa Pública de Obras e Servizos Hidráulicos (EPOSH) para obras hidráulicas nas parroquias, na súa primeira fase.

O concelleiro de Educación, Ángel Currás, clausurou unha nova edición da Escola Municipal de Verán de Inglés English Summer School. 205 nenos e nenas participaron neste programa, desenvolvido do 1 ao 29 de xullo.

A Asemblea Ordinaria do Grupo Cidades Patrimonio da Humanidade de España reuniuse na Casa Canals de Tarragona. A Asemblea foi presidida polo alcalde de Santiago e actual presidente do Grupo, Xerardo Conde Roa.

Inaugurouse na Fundación Eugenio Granell un novo espazo: a Sala Lucernario. Trátase dunha nova estancia deseñada interiormente polo arquitecto Marcos Zacarías. A proposta complétase coa colocación da peza Árbol 32, que o artista Xurxo Oro Claro doou especificamente para este espazo.

O alcalde e presidente do Consorcio de Santiago, Xerardo Conde Roa, e o reitor da Universidade de Santiago, Juan Casares, asinaron un convenio para a vinculación da Escola de Altos Estudos Musicais de Galicia á Universidade. Este acordo vai supoñer un importante impulso aos estudos superiores en materia de práctica orquestral que se desenvolven na Escola, asociada dende o seu inicio á Real Filharmonía de Galicia.

O alcalde compostelán, Xerardo Conde Roa, e o secretario xeral de Emigración, Santiago Camba, asinaron un convenio de colaboración para financiar a Unidade de Atención a Migrantes (UAMI). En virtude do mesmo, o organismo autonómico achega 50.000 euros para a provisión de persoal do devandito centro, sendo a contribución municipal doutros 20.000 euros.

Na sesión ordinaria de xullo do Pleno da Corporación deuse conta dun acordo da Xunta Local sobre a solicitude de subvencións á Xunta de Galicia ao abeiro da Orde de 3 de marzo de 2011, pola que se regulan as bases para a concesión de subvencións.