{*titulo}

O alcalde compostelán, Xerardo Conde Roa, prosegue coa súa rolda de contactos cos rexedores dos municipios da bisbarra. Desta vez foi o alcalde de Vedra, Carlos Martínez Carrillo, o que pasou por Raxoi para falar de cuestións como as melloras das comunicacións entre os dous concellos ou accións de promoción turística conxuntas.

O concelleiro de Deportes, Adrián Varela, fixo balance da instalación da pista de xeo na praza da Quintana. Cualificou de "notable, rozando o sobresaínte" o resultado dunha actividade que congregou preto de 41.000 visitantes.

O concelleiro de Cultura, Ángel Currás, e o director-xerente do Auditorio de Galicia, José Víctor Carou, presentaron un novo ciclo musical, desta vez centrado arredor do jazz: o Jazz in Blue. Este ciclo ofrécenos a oportunidade de achegarnos a unha música radicalmente creativa, recoñecida a nivel internacional e de incontestable calidade, realizada por tres artistas que marcan moitos dos camiños polos que transcorre o mellor jazz actual; Erik Truffaz 4tet, Joe Lovano Quartet e The Bad Plus.

O alcalde compostelán, Xerardo Conde Roa, asistiu xunto coa concelleira de Benestar Social, Paula Prado, á inauguración da sede da Asociación Compostelá de Nenos Hiperactivos.

A Escola Municipal de Música avanzou en rolda de prensa a programación do segundo trimestre do ano, que terá como marco escénico, ademais do propio centro, numerosos espazos emblemáticos da cidade. Ademais, a Escola presenta nova páxina web, co obxecto de dar unha mellor atención aos alumnos, ás familias e ao público en xeral.

O concelleiro de Tráfico e Mobilidade, Albino Vázquez, presentou o novo sistema de información do transporte urbano e as modificacións nas liñas que se porán en marcha a partir do 6 de febreiro. Esta primeira fase de reestruturación suporá a creación de tres novas liñas e a modificación doutras oito.

A Xunta de Goberno aprobou na súa sesión ordinaria a adhesión do Concello de Santiago a unha petición do Concello de Trazo de construción pola Deputación da Coruña dunha ponte no río Tambre, unindo Vilouchada e Busto. Ademais, deuse o visto bo á solicitude dunha subvención para varios programas de fomento do galego.

A praza do Obradoiro acollerá o venres 3 de febreiro, ás 12:00 horas, un tradicional "Atranque" do "Entroido da Ulla – Xenerais da Ulla", como exemplo das múltiples actividades que terán lugar durante o mes de febreiro nos oito concellos onde esta festividade ten máis calado e que por primeira vez colaboran na súa promoción conxunta: Boqueixón, A Estrada, Santiago, Silleda, Teo, Touro, Vedra e Vila de Cruces.

Xa é posible inscribirse no Fórum Gastronómico que terá lugar do 26 ao 28 de febreiro en Santiago. A través do portal web www.forumsantiago.com todos os profesionais, gourmets e interesados poden asegurar a súa praza nas distintas actividades da cita. O Fórum celebrarase no Palacio de Congresos e Exposicións de Galicia e converterase no escaparate para todo o sector agroalimentario galego e no punto de encontro enogastronómico profesional.

O concelleiro de Participación Cidadá e Centros Socioculturais, Francisco Noya, mantivo unha reunión con todo persoal municipal dos centros socioculturais. O encontro celebrouse no CSC de Villestro.