BENESTAR ANIMAL

O Refuxio de Animais abrirá ao público o 21 de xuño

02/06/2020 A concelleira de Benestar Animal, Esther Pedrosa e a directora do Refuxio de Animais de Bando, Olalla García, explicaron en rolda de prensa o plan de desescalada desta instalación municipal. A partir do 21 de xuño, o Refuxio abrirá ao público nos horarios habituais.

Olalla García lembrou que o Refuxio de Animais, pechou as portas ao público (incluído voluntariado, padriños/madriñas e demais usuarios/as) o sábado 14 de marzo. O centro estivo cerrado ao público excepto para casos excepcionais, como a recepción de animais por parte dos habituais servizos de recollida animal de cada concello, ou a entrega de animais aos seus propietarios e propietarias en caso de extravío, sempre e cando así o permitisen as autoridades.

Durante este período de tempo seguiuse atendendo chamadas telefónicas e respondendo mensaxes nas redes sociais e a través do correo electrónico, así como xestionando adopcións de xeito telemático (cuestionarios pre-adopción, etc.).

Dende o pasado 11 de maio comezouse a entrega de animais en adopción, sempre con cita previa, e tomando as medidas oportunas para evitar riscos tanto para os/as traballadores/as do Refuxio como para o propio público.

Desescalada
A partir do sábado 6 de xuño retomaranse no Refuxio os habituais horarios e quendas dos/das traballadores/as, mais ata o 21 deste mes as instalacións permanecerán pechadas e atendendo con cita previa. A partir desta data abrirase ao público nos horarios habituais.

Olalla García pediu ás persoas interesadas en adoptar que acudan ao Refuxio no horario acordado e pregoulles puntualidade. Segue sendo obrigatorio o uso de máscara para acceder ás instalacións e o seu uso en todo momento, así como gardar a distancia de seguridade recomendada e seguir as indicacións do persoal do centro. Recoméndase tamén o uso de luvas e proporcionaráselles xel hidroalcohólico para a desinfección das mans.

O voluntariado poderá acceder ao Refuxio a partir do 8 de xuño, mais ata o 21 poderá acudir por quenda un máximo de tres persoas. A partir desta data e ata o 5 de xullo, grupos máximos de seis persoas e, dende o 5 ata o 22 de xullo, grupos de como moito dez.

No caso dos padriños e madriñas, poderán retomar a actividade dos paseos a partir do 22 de xuño, e ata o 22 de xullo será con cita previa e cun número máximo de persoas por quenda. Entre semana poderán acudir un máximo de cinco persoas por quenda, mentres que nas fins de semana o límite será de dez por quenda. Estas persoas serán informadas sobre o sistema de cita previa a través dunha aplicación que se lles fará chegar a través do correo electrónico.

Outras actividades, como a visita de colexios ou colectivos, retomaranse a partir setembro, sempre con cita previa, como se viña facendo, e sempre que sexa posible.

Direccións relacionadas



Compartir: