EMPREGO

Talentia Summit ’19 congregou a máis de 5000 persoas ao redor do talento e o emprego en Santiago

23/10/2019 Santiago de Compostela converteuse na capital do talento durante estes días acollendo o cume Talentia Summit ‘19, que tivo lugar desde este luns 21, ata o día de hoxe. Unha cita anual que este ano acodou cifras altamente positivas, mobilizando a máis de 5.000 persoas de toda Galicia e involucrando directamente ao tecido produtivo e económico máis importante da cidade. O alcalde de Santiago, Xosé Sánchez Bugallo, clausurou hoxe o evento nun acto institucional no que tamén participou a concelleira de Compostela Aberta, Marta Lois, e membros do Pacto local polo Emprego.

Xosé Sánchez Bugallo destacou o éxito desta edición, e emprazou á organización a seguir traballando para que a do próximo ano sexa mellor. E para iso, engadiu "seguiremos necesitando o concurso, o apoio e a participación de todas as empresas e a confianza de todos aqueles que buscan unha oportunidade no mercado laboral".

Talentia Summit ’19 congregou na gala de apertura presidida pola ministra de Economía en funcións Nadia Calviño, o presidente da Xunta de Galicia, Alberto Núñez Feijóo; e o alcalde de Santiago, Xosé A. Sánchez Bugallo, a executivos de grandes empresas como Hijos de Rivera, Samsung España, Telefónica, Banco Sabadell ou Great Place to Work.

Posteriormente tivo lugar a Feira do talento celebrada no Palacio de Congresos e Exposicións de Galicia, con múltiples actividades para potenciar o emprego.

Talentia Summit ’19 contou cunha gran acollida entre público e acadou cifras considerables: máis de 1000 vacantes abertas no marco de Talentia Summit ’19 xestionadas mediante a súa web; 100 empresas participantes durante a Feria do Talento, 70 delas recrutando talento directamente durante o evento; 940 asistentes en actividades de formación, certificación e desenvolvemento do talento; 400 persoas usuarias dos talleres como vídeo-currículo profesional, fotografía profesional, redeseño do CV e LinkedIn e orientación laboral; e 370 persoas que asistiron a sesións de mentoring persoal para recibir resposta a dúbidas dos seus sectores profesionais.

Compartir: